एजेन्सी – क्याटलान क्लब बार्सिलोनाको इतिहासकै सर्वाधिक महँगा खेलाडी हुन् फिलिपे कोउटिन्हो । सन् २०१८ मा विशाल लक्ष्य लिएर बार्सिलोना आइपुगेका कोउटिन्हो अपेक्षित प्रदर्शन गर्न नसक्दा क्लबबाट बाहिरिने संघारमा छन् ।

बार्सिलोनाले क्लबका दिग्गज खेलाडी आन्द्रेस इनिएस्टाको कमी पूरा गर्न ब्राजिलियन मिडफिल्डरमाथि मोटो रकम खर्चेको थियो । इंग्लिस क्लब लिभरपुलमा स्टार खेलाडीका रुपमा रहेका कोउटिन्होले त्यसै छवीलाई बार्सिलोनामा भने सिद्ध पार्न सकेनन् । प्रचुर अवसर पाउँदा पनि त्यसको सदुपयोग गर्नबाट चुकेपछि क्लबले उनलाई अन्यत्र जाने ढोका खोलिदिएको छ ।

२७ वर्षीय मिडफिल्डर बार्सिलोनाको लिगको पहिलो खेलमा दर्शकदिर्घामा रहेका थिए । क्लबका कप्तान लिओनेल मेस्सीको अनुपस्थितिमा कमजोर रहेको आक्रमणलाई सुधार्ने क्षमता कोउटिन्होमा थियो । तर क्लबले उनको आवश्यकता महसुस गरेन र उनलाई टोलीमा समेटेन । कोउटिन्होले नियमित फुटबल खेल्न भएपनि क्लब छाड्ने अवस्था आएको छ । यसका लागि उनले जर्मनीको बायर्नलाई आफ्नो गन्तव्य बनाउने बुझिएको छ ।

बार्सिलोनाका लागि कोउटिन्होले हालसम्म कुल ७६ खेल खेलेका छन् । उनको आगमनपछि क्लबमा उनीभन्दा बढी जोर्डी अल्बा र इभान राकीटिचले मात्र खेलेका छन् । तर उनले अवसर सदुपयोग गर्न भने सकेका छैनन् । उनले यसक्रममा जम्मा २१ गोल गरेका छन् । उनको तुलनामा लुइस सुआरेजले ४० र मेस्सीले ७१ गोल गरेका छन् ।

बार्सिलोनाले कोउटिन्होलाई आबद्ध गर्न १ सय २० मिलियन युरो खर्च गरेको हो । विश्व फुटबलको इतिहासमा यो सर्वाधिक महँगो ट्रान्सफरको शीर्ष ५ मै पर्छ । तर प्रदर्शनमा भने बार्सिलोनाले धोका खाएको छ । बार्सिलोनाले कोउटिन्होमाथि कुनै आशा नराखी उनलाई अन्यत्र पठाउने निर्णय नै गरिसकेको छ । अब मात्र उनको नयाँ गन्तव्य थाहा पाउन बाँकी छ ।