एजेन्सी – नेयमारलाई पेरिस सेन्ट जर्मेनका प्रशिक्षक थोमस टुचेल र टोलीका अन्य साथीले शनिबार प्रशिक्षण आत्मियताका साथ स्वागत गरेका छन् । यद्दपी उनी क्लबमा रहने नरहने विषयमा भने अहिले सम्म प्रष्ट भइसकेको छैन ।

२७ वर्षे ब्राजिलियन सुपर स्टार पुनः बार्सिलोना फर्केने चर्चाै अझै सेलाएको छैन । दुई वर्षअघि १ सय ९८ मिलियन पाउन्डमा उनी बार्सिलोनाबाट पिएसजी पुगेका थिए । पिएसजी पुगेदेखि नै नेयमार क्लबसँग खुसी नरहेको पटक पटक सार्वजनिक हुँदै आएको छ ।

उनी पटक पटक विवादित कारणले चर्चामा आउने गरेका छन् । मेमा उनी तीन खेलको प्रतिबन्धमा परेका थिए । त्यस्तै म्यानचेस्टर युनाइटेडविरुद्ध च्याम्पियन्स लिगको खेलमा म्याच अफिसियलहरुलाई अपमान गरेपछि युईएफएले प्रतिबन्ध लगाएको थियो ।

अब बिस्तारै पिएसजीका समर्थक नेयमारप्रति आक्रोषित हुन थालेका छन् । यो सिजनको पहिलो खेलमा उनी टोलीमा थिएनन् । तर पनि समर्थकले उनका विरुद्ध लेखिएको ब्यानर प्रदर्शन गरेका थिए । उनकाविरुद्धमा नारावाजी पनि भएको थियो ।

त्यसका वावजुद प्रशिक्षक टुचेल र टोलीका अन्य साथीहरुले उनीलाई हार्दिकता पूर्वक स्वागत गरेको देखिएको थियो । उनले प्रशिक्षकसँग अंकमाल गरे । टोलीका अन्य खेलाडी केलियन एमबाप्पे र थिएगो सिल्भासँग गफ गरिरहेका थिए ।

पिएसजीका स्पोर्टिङ डाइरेक्टर लियोनार्दोले अहिले पनि नेयमार टोलीको हिस्सा रहेको प्रष्ट पारिसकेका छन् । उनी र बार्सिलोनाका प्रतिनिधिबीच नेयमारका विषयमा छलफल भएपनि पिएसजीले प्रस्ताव अस्वीकार गरेको थियो ।

‘दुई क्लबका बीचमा छलफल भएको सबैलाई थाहा छ ,’ लियोनार्दोले भने,‘ तर केहि टुंगो लागेको छैन । ’ बार्सिलोना भने नेयमार भित्राउनेमा अझै आशावादी रहेको बताइन्छ । नेयमार आफै पनि पिएसजी छोड्ने मनस्थितिमा छन् । आइतबार हुने रिनेसविरुद्धको खेलमा पनि नेयमार नखेल्ने बताइएको छ । चोटका कारण उनी सन् २०१९ मा अधिकांश समय मैदान बाहिर छन् ।