एजेन्सी – यसै सिजन इंग्लिस क्लब चेल्सीबाट स्पेनिस क्लब रियाल म्याड्रिड पुगेका बेल्जियन इडेन हजार्डले ला लिगामा डेब्यु लम्विने भएको छ ।

प्रशिक्षणका क्रममा थाइमा चोट बोक्न पुगेपछि हजार्डले शनिबार राति हुने सेल्टा डि भिगोविरुद्धको पहिलो खेल गुमाउने भएसँगै ला लिगामा उनको डेब्यु पछि धकेलिएको हो । रियालले ला लिगाको पहिलो खेलमा आज राति सेल्टासँग खेल्दैछ ।

हजार्डले शुक्रबार क्लबको प्रशिक्षण दौरान दाया थाईमा समस्या बोक्न पुगेका थिए । लगत्तै उनको परिक्षण गरिएको थियो । रिपोर्टअनुसार उनको चोट सामान्य नै रहेको बताइएको छ । तर, क्लबको रिपोर्टअनुसार उनी तीन देखि चार साता क्लबमा नहुने बताइएको छ ।

यसले हजार्डको ला लिगामा डेब्यु लम्बिने पक्का छ । यसो भए हजार्डले ला लिगाका तीन खेल रियल भालाडोलिड, भिल्लारियल र लेभान्टेसँगको खेल गुमाउनेछ ।

रियालले हजार्डलाई गत महिना १५० मिलियन पाउन्डमा क्लबमा अनुबन्ध गरेको थियो । रियाल आएयता हजार्डले प्रि–सिजनमा एक गोल मात्रै गरेका छन् ।

रियालका विङ्गर मार्काे एसेन्सिया घुडाको चोटका कारण तथा ड्यानी कार्भाहल प्रतिबन्धमा रहँदा जिदानलाई थप समस्या हुने देखिएको छ । तर, प्रशिक्षक जिदानले वेल्सका ग्यारेथ बेल र हामेस रोड्रिग्वेजलाई प्रशिक्षणमा समावेश गरेको छ ।