एजेन्सी – क्याटलान क्लब बार्सिलोनाका प्रशिक्षक इर्निस्टो भाल्भेर्डेले ब्रजिली स्टार फरवार्ड नेयमार बार्सिलोना फर्कन सक्ने तर अहिले उनी फ्रेन्च क्लब पीएसजीको हिस्सा रहेको बताएका छन् ।

पछिल्लो एक साता नेयमार सरुवाको विषयले विश्व फुटबल गर्माएको छ । पीएसजीका नेयमारलाई अनुबन्ध गर्न दुई स्पेनिस क्लब बार्सिलोना र रियल म्याड्रिड दौडमा छन् । तर, ठोस प्रगति हुन सकेको छैन ।

नेयमार अनुबन्ध गर्न बार्सिलोनाले बढी चासो देखाइरहँदा पनि ठोस प्रगति हुन नसक्दा प्रशिक्षक भाल्भेर्डेले आफू विचलित नरहेको बताएका छन् । ‘क्लब पदाधिकारी नेयमारलाईलाई अनुबन्ध गर्ने प्रयासमा छन् । तर, ठोस प्रगति हुन सकेको छैन । तर, म विचलित छैन,’ प्रशिक्षक भाल्भेर्डेले भने, ‘मसँग अहिले मेरो टिमका खेलाडीसँग मात्र सोच्ने समय छ । अन्य क्लबको खेलाडीबारे सोच्ने समय छैन । म अहिले खेलाडी अनुबन्ध भन्दा पनि प्रशिक्षणमा केन्द्रित छु ।’

उनले नेयमार बार्सिलोना आउन सक्ने भएपनि उनी अहिले अर्काे क्लब पीएसजीको हिस्सा रहेको थपेका छन् । ‘मसँग अहिले पुर्ण टोली छ । म यही टोलीबाट सन्तुष्ट छु । मसँग अहिले अन्य क्लबको खेलाडीको बारेमा बोल्ने समय छैन,’ भाल्भेर्डेले थपे, ‘म प्रशिक्षक हुँ । मेरो काम राम्रो खेलाडी क्लबमा अनुबन्ध गर्ने हो । यो मैले प्राप्त गरेको छु । क्लबले पनि राम्रो खेलाडी अनुबन्ध खोज्ने हो ।’

नेयमार अनुबन्ध गर्नको लागि बार्सिलोनाले पहिलो प्रयासमा केही रकम र फिलिपे कौटिन्हो दिने प्रस्ताव गरेपनि पीएसजीले उक्त प्रस्ताव अस्वीकार गरेको थियो । त्यसपछि बार्सिलोनाले कौटिन्हो र इभान राकिटिक र केही मुल्य दिने प्रयास पनि थालेको छ । बार्सिलोनाका प्रशिक्षक भाल्भेर्डेले राकिटिक पछिल्लो दुई वर्षदेखि टोलीको महत्वपुर्ण खेलाडी रहेको र उनी अझैपनि टोलीमै रहनेमा आशावादी रहेको बताएका छन् ।