एजेन्सी – जर्मन च्याम्पियन बायर्न म्युनिखले क्रोएसियाका फरवार्ड इभान पेरिसिचलाई इटालियन क्लब इन्टर मिलानबाट लोनमा अनुबन्ध गरेको छ ।

सन् २०१८ को विश्वकपमा क्रोएसियाले फाइनल यात्रा तय गर्दा टोलीका महत्त्वपूर्ण सदस्य रहेका पेरिसिचले यसअघि नै जर्मन लिग खेलिसकेका छन् । उनले बोरुसिया डर्टमुन्ड र भिएफएल वलफ्सबर्गबाट सन् २०११ र २०१५ को बिचमा खेलेका थिए । बायर्नले उनलाई पहिलो सिजन लोन र अर्को सिजन खरिद गर्ने विकल्प सहित अनुबन्ध गरेको हो ।

३० वर्षीय फरवार्डले आर्जेन रोबेन र फ्रान्क रिबेरीको प्रस्थानपछि बायर्नको विंगमा अनुभव थप्नेछन् । बायर्नमा हाल सर्ज गनाब्री र किङस्ले कोमानका रुपमा युवा विंगर रहेका छन् । कोमन पछिल्लो समय चोटले ग्रस्त रहेका हुनाले पनि पेरिसिचको भूमिका अहम रहनेछ ।

बायर्नका खेलकुद निर्देशक हसन सलिहमिदिजले पेरिसिचको अनुभवले टोलीलाई निकै फाइदा पुग्ने बताए । ‘इभान सिधै हाम्रो टोलीको आक्रमणमा मिसिन सक्ने खेलाडी हुन् । उनले जर्मन लिग नजिकबाट नियालेका छन् र प्रशिक्षक कोभाचसँग पनि काम गरेको अनुभव छ । उनको खेल्ने शैली र आक्रमणमा जहाँ पनि खेल्न सक्ने क्षमताले हामीलाई फाइदा हुनेछ,’ उनले भने ।

बायर्नले यसअघि म्यानचेस्टर सिटीका मिडफिल्डर लेरोय सानेलाई अनुबन्धन गर्ने प्रयास गरेको थियो । तर २३ वर्षीय जर्मन मिडफिल्डर साने कम्युनिटी सिल्ड खेलका क्रममा लिभरपुलविरुद्ध घाइते भएपछि उक्त प्रक्रिया अगाडि बढेन । साने एन्टेरियर क्रुसिएट लिगामेन्ट (एसीएल) को चोटका कारण झन्डै ९ महिना बाहिर रहनेछन् ।

सिजनको पहिलो खेलमा बायर्नले सुखद सुरुवात गर्न सकेन । जर्मन सुपर कपमा डर्टमुन्डसँग पराजित बायर्नले लिगको पहिलो खेलमा शुक्रबार हर्था बर्लिनको सामना गर्नेछ ।