एजेन्सी – इंग्लिस प्रिमियर लिग फुटबलको नयाँ सिजनको पहिलो ‘बिग म्याच’ मा आज राति म्यानचेस्टर युनाइटेड र चेल्सीले प्रतिस्पर्धा गर्दैछ । खेल म्यानचेस्टर युनाइटेडको घरेलु मैदान ओल्ड ट्राफोर्डमा राति ९ः१५ बजे शुरु हुनेछ ।

१९५८ पछि युनाइटेडले घरेलु मैदानमा लिगको पहिलो खेलमा चेल्सीसँग खेल्न लागेको हो । उक्त खेलमा युनाइटेड ५–२ ले विजयी हुदा बोबी चाल्र्सटनले ह्याट्रिक पुरा गरेका थिए । त्यसपछि सन् २००५ को सिजनमा चेल्सीको मैदानमा युनाइटेडले लिगको पहिलो खेल नै खेलेको थियो । जसमा चेल्सी १–० ले विजयी भएको थियो । उक्त सिजन चेल्सी नै प्रिमियर लिग च्याम्पियन बनेको थियो ।

उपाधिका दाबेदार दुवै टोलीलाई यो खेल निकै महत्वको छ । त्यसैले दुवै टोली महत्वुपर्ण ३ अंकका लागि नै मैदान उत्रने छ । खेल निकै प्रतिस्पर्धात्मक र रोमाञ्चक हुने अपेक्षा गरिएको छ ।

चेल्सीका नयाँ प्रशिक्षक फ्रान्क लाम्पार्डको लागि युनाइटेडविरुद्धको पहिलो खेल नै अग्नि परीक्षा हुनेछ । तर, लाम्पार्ड ओल्ड ट्राफोर्डमा प्रशिक्षकको रुपमा दोस्रोपटक मैदान उत्रन लागेको हो । लाम्पार्ड यसअघि कारबाओ कपमा डर्बी काउन्टीको प्रशिक्षक रहँदा यो मैदानमा प्रशिक्षकको रुपमा रहेको थियो । जसमा डर्बीले बाजी मारेको थियो ।

मुख्य फरवार्ड इडेन हजार्डबिनाको चेल्सीको अग्रपङ्ति नयाँ खेलाडी टम्मी अब्राहम र क्रिस्टियन पुलिसिकले सम्हाल्नेछन् । मासन माउन्टले पनि ‘डेब्यु’ गर्ने सम्भावना छ । चोटबाट गुज्रिरहेको चेल्सीले एङ्गोल कान्टेले खेल्ने सम्भावना रहँदा रुबेन लफटस चिक, एन्टेनियो रुडिगर र कलुह हड्सन ओडोई युनाइटेडविरुद्ध उपस्थित हुने छैनन्।

यता, उपाधि जित्ने अभियानमा रहेको युनाइटेडबाट यो सिजन कीर्तिमानी रकममा अनुबन्ध भएका ह्यारी मिगुइरेले खेल्ने सम्भवना रहँदा पल पोग्वा, र एलेक्सिस सान्चेजले खेल्ने सम्भावना न्युन छ ।

चेल्सीविरुद्ध युनाइेटडको पछिल्लो प्रदर्शन निकै खराव छ । पछिल्ला १३ खेलमा मात्रै दुई खेलमा जित हात पार्दा युनाइटेडले ६ बराबरी र ५ हारको नतिजा निकालेको छ ।