एजेन्सी – इंग्लिस प्रिमियर लिगको डिफेन्डिङ च्याम्पियन म्यानचेस्टर सिटीले नयाँ सिजनको पहिलो खेलमा वेस्ट ह्याम युनाइटेडलाई ५-० ले पराजित गर्दै सानदार सुरुवात गरेको छ । सिटीको जितमा विंगर रहिम स्टरलिङले ह्याट्रिक पूरा गरे ।

सिटीले खेलको २५ औं मिनेटमा अग्रता लिएको थियो । काउन्टर अट्याकमा काइल वाल्करले दिएको लो क्रसलाई ग्याब्रीएल जेससले गोलको दिशा दिँदै सिटीलाई अग्रता दिलाएका थिए । पहिलो हाफमा १-० ले अगाडी रहेको सिटीका लागि रहिम स्टरलिङले ५१ औं मिनेटमा दोस्रो गोल थपे । उनले पेनाल्टी क्षेत्रभित्र केभीन डे ब्रुएनको पासलाई वेस्ट ह्यामका गोलरक्षकको खुट्टा मुनिबाट गोल गरेका थिए ।

त्यसपछि सिटीका लागि जेससले गोल गरेपनि भिडियो असिस्टेन्ट रेफ्री (भीएआर) ले उक्त गोल अफसाइड भएका कारण मान्यता दिएन । ७५ औं मिनेटमा स्टरलिङले व्यक्तिगत दोस्रो गोल गर्दै सिटीलाई ३-० ले अगाडी बढाए । वैकल्पिक खेलाडी रियाद माहरेजको उत्कृष्ट चिप पासमा स्टरलिङले उत्कृष्ट फिनिस गर्दै गोल गरे ।

वैकल्पिक खेलाडीका रुपमा मैदान प्रवेश गरेका सर्जियो अगुएरोले ८६ औं मिनेटमा पेनाल्टीमा गोल गर्दै सिटीलाई ४-० को अग्रता दिलाए । माहरेजलाई पेनाल्टी क्षेत्रभित्र लडाएपछि सिटीले पेनाल्टी पाएको थियो । पहिलो प्रहार गोलरक्षकले बचाएको अवस्थामा वेस्ट ह्यामका खेलाडी प्रहार गर्नुअघि नै पेनाल्टी क्षेत्रभित्र पस्दा र गोलरक्षक लाइनबाहिर निस्कँदा दोस्रो प्रहार लिइएको थियो ।

इन्ज्युरी समयको पहिलो मिनेटमा स्टरलिङले ह्याट्रिक पूरा गर्दै जित पक्का गरे । उनले रियाद माहरेजको उत्कृष्ट थ्रु बललाई पेनाल्टी क्षेत्रभित्र बढाउँदै गोल गरेका थिए । यस जितसँगै सिटीले नयाँ सिजनको पहिलो खेलमा ३ अंक जोडेको छ ।