एजेन्सी – विश्व फुटबलका सुपरस्टार नेयमार र उनको क्लब पेरिस सेन्ट जर्मेन (पीएसजी) बीच पछिल्लो समय सुमधुर सम्बन्ध रहेको छैन । नेयमारको व्यवहारले आजित पीएसजी उनलाई उचित प्रस्ताव आएमा छाड्न दिने पक्षमा छ । तर कुनै क्लबले पीएसजीलाई औपचारिक प्रस्ताव अगाडी सारेका छैनन् ।

पीएसजीमा अझैपनि नेयमारको भविष्यबारे निर्णय भएको छैन । खेलाडी र क्लब दुवै पक्ष भविष्यलाई लिएर चिन्तित छन् । बार्सिलोनाले ट्रान्सफर विन्डोको सुरुवातदेखि नेयमारलाई अनुबन्ध गर्ने भनेपनि फ्रान्सेली फरवार्ड एन्टोइन ग्रिजमनको आगमनसँगै अब नेयमार बार्सिलोना जाने एकदम कम सम्भावना रहेको छ ।

क्रिस्टियानो रोनाल्डोको प्रस्थानपछि उनको उत्तराधिकारीको खोजीमा रहेको रियल म्याड्रिड नेयमारको लागि उचित गन्तव्य हुने देखिन्छ । रियलका लागि मात्र नभएर नेयमार र पीएसजीका लागि यो उचित विकल्प हुन सक्छ । रियलले नेयमारलाई अनुबन्ध गर्न उनको माग पूरा गर्न सक्छ । पीएसजीको माग अनुसारको रकम तिर्न पनि रियल सक्षम छ । नेयमारले यसअघि ला लिगामा आफूलाई सिद्ध गरेका कारण पनि रियललाई थप फाइदा छ ।

बार्सिलोनामा यसअघि लिग, च्याम्पियन्स लिग र कप उपाधि जितिसकेका नेयमारले यस सिजन पीएसजीका लागि खेलेका छैनन् । कोपा अमेरिकामा चोटका कारण खेल्न नसकेका उनले पीएसजीको प्रशिक्षणमा तोकिएको समयभन्दा १ साता ढिला पुगेका थिए । पछिल्लो सिजन नै मैदानबाहिर राम्रो व्यवहार नदेखाएको आरोप लागेको नेयमारलाई यस घटनाले थप समस्या दिएको हो ।