एजेन्सी – इंग्लिस क्लब टोटेनहम हट्स्परले लामो समयदेखि पछ्याइरहेको अर्जेन्टिनी मिडफिल्डर जिओभानी लो सेल्सोलाई स्पेनिस क्लब रियल बेटिसबाट अनुबन्ध गरेको छ ।

प्रशिक्षक माउरिसियो पोचेटिनोले पहिलो रोजाईका रुपमा लिएका मिडफिल्डर लो सेल्सो पहिलो वर्ष भने लोनमा टोटेनहम आएका हुन् । क्लबले उनलाई अर्को सिजन ५५ मिलियन पाउण्ड तिरेर स्थायी रुपमा अनुबन्ध गर्न पाउनेछ । २३ वर्षीय मिडफिल्डर गत सिजन मात्र पेरिस सेन्ट जर्मेन (पीएसजी) बाट बेटिस पुगेका थिए ।

अर्जेन्टिनाको राष्ट्रिय टोलीका लागि १९ खेल खेलिसकेका सेल्सोले गत सिजन उत्कृष्ट प्रदर्शन गरेका थिए । उनले ४५ खेल खेल्दै १६ गोल गरेपछि टोटेनहमको नजरमा पर्न सफल भए । उनी कोपा अमेरिका २०१९ मा पनि अर्जेन्टिनाको टोलीमा रहेका थिए । उनले प्रतियोगिताको ६ खेलमा नै सहभागिता जनाएका थिए । त्यसक्रममा उनले १ गोल र १ असिस्ट प्रदान गरेका थिए ।

टोटेनहमले ट्रान्सफरको अन्तिम दिन इंग्ल्यान्डको यू-२१ टोलीका डिफेन्डर रायन सेस्सेन्गनलाई पनि अनुबन्ध गरेको छ । फुलहमबाट २५ मिलियन पाउण्डमा अनुबन्ध भएका १९ वर्षीय रायन टोटेनहम आउँदा स्पर्सका मिडफिल्डर जोस ओनोमाह भने फुलहम गएका छन् । टोटेनहमले यसअघि क्लब कीर्तिमान ६३ मिलियन पाउण्डमा लियोनबाट मिडफिल्डर तान्गुई एनडोम्बेलेलाई अनुबन्ध गरेको थियो । युवा विंगर ज्याक क्लार्क भने लिड्सबाट स्पर्स आएपनि यस सिजन त्यसै क्लबमा लोनमा फर्केका छन् ।