काठमाडौं (हाम्रो खेलकुद) – नेपाली राष्ट्रिय फुटबल टोली लाओसबाट भोली (मंगलबार) स्वदेश फर्केने छ । टोली भोली थाइ एयरबाट दिउँस त्रिभुवन विमानस्थलमा ओर्लने अखिल नेपाल फुटबलल संघ (एन्फा)का प्रवक्ता समेत रहेको इन्द्रमान तुलाधारले जानकारी दिए ।

नेपाली राष्ट्रिय फुटबल टोलीका खेलाडी ।

नेपाली टोलीले शनिबार आइतबार साँझ लाओसको राष्ट्रिय टोलीसँग १–१ को बराबरी खेलेको थियो । दोस्रो हाफमा लिएको अग्रतालाई जोगाउन नसक्दा आफुभन्दा फिफा वरियतामा माथि रहेको टोलीलाई हराउने मौका नेपालले गुमाएको थियो । फिफा वरियतामा नेपाल १ सय ८० औं र लाओस त्यो भन्दा चार स्थानमाथि १ सय ७६ औं स्थानमा छ । आफुभन्दा माथिल्लो वरियताको टोलीसँग बराबरी खेलेको नेपालले अर्को महिनाको फिफा वरियतामा सुधार गर्ने सम्भावना भने बढेको छ ।
७७ औं मिनेटमा मिडफिल्डर विशाल राईले पेनाल्टी एरियाबाट प्रहार गरेको बल गोलमा परिणत भएपछि नेपालले अग्रता लिएको थियो । तर, त्यसलाई नेपालले दुई मिनेटपछि जोगाउन सकेन । ७९ औं मिनेटमा कर्नरबाट आएको बलमा घरेलु टोली बराबरी गोल फर्काएको थियो । छ महिनापछि राष्ट्रिय टोलीमा पुनरागमन गरेको अनिल गुरुङ कप्तानीमा २० सदस्यीय टोलीको घोषणा भएपनि लाओसविरुद्धको पहिलो रोजाइमा भने उनी परेनन् । लाओसविरुद्धको खेलमा बंगबन्धु गोल्डकप र १२ औं दक्षिण एसिायली खेलकुदमा स्वर्ण जित्दाका कप्तान विराज महर्जनले नै नेतृत्व सम्हालेका थिए ।