एजेन्सी– साउ पाउलोमा डानी अल्भेसको भव्य स्वागत भएको छ । ब्राजिलिन भेट्रान फुल ब्याक सन् २०२२ सम्म नयाँ क्लबमा रहनेछन् । भव्य समारोह अघि उनलाई सयौं समर्थकले विमानस्थलमा भव्य स्वागत गरेका थिए ।

बार्सिलोना र पेरिस सेन्ट जर्मेनका पूर्व स्टार क्लबको मैदानमा सार्वजनिक हुँदा ४० हजार भन्दा बढी समर्थकहरुको उपस्थिति थियो । डेढ दशक भन्दा लामो समयपछि आल्भेस स्वदेशको फुटबलमा फर्कदा ठूलो खुसी मनाइएको थियो । साउ पाउलोका महान खेलाडी मध्ये ३ जना उक्त समारोहमा उपस्थित थिए ।

क्लबका कप्तान हर्नानेसले समर्थकबीच आल्भेसलाई प्रस्तुत गरे भने ३६ वर्षे स्टारलाई काकाले १० नम्बर जर्सी हस्तान्तरण गरे । त्यस्तै लुइस फाबियानोले उनलाई अर्को जर्सी प्रदर्शनका लागि दिएका थिए । सो अवसरमा कासिमेरो, लुइस स्वारेजको भिडियो सन्देश पनि प्रसारण गरिएको थियो । त्यस्तै लियोनल मेस्सीले पनि पूर्व सहकर्मिका बारेमा बोलेको सन्देश समारोहमा प्रस्तुत गरिएको थियो ।

हालै ब्राजिललाई कोपा अमेरिका उपाधि दिलाउदा टोलीको नेतृत्व गरेको अल्भेसले २०२२ को विश्व कप खेल्ने योजना सुनाए । ‘मरा आफ्नो केहि लक्ष्य छन् । ब्राजिल फर्केपछि मैले आफुलाई पनि प्रमाणित गर्नुपर्नेछ’ , आल्भेसले भने, ‘यहाँका जनताले पनि मबाट पक्कै केहि अपेक्षा राखेका छन् । अबको विश्व कप खेल्ने मेरो प्रयास हुनेछ । त्यसका लागि यो क्लबले मेरो लागि मौका उपलब्ध गराएको छ । ‘