एजेन्सी – वायने रुनी अमेरिका छाडेर इङ्लिस फुटबलमा फर्कने सम्भावना बढेको छ । डर्बी काउन्टीमा उनी खेलाडी र प्रशिक्षक दुवै भूमिकामा फर्कने सम्भावना रहेको बताइएको छ ।

३ वर्षको सम्झौतासहित मजर लिग सकर टोली डिसी युनाइटेडमा आबद्ध भएका रुनी १३ महिना पछि नै नयाँ भूमिकाका साथ स्वदेश फर्कने अनुमान गरिएको छ । सोमबार राती उनी अमेरिकाबाट इङ्ल्यान्ड फर्केपछि सम्भवत उनको नयाँ सम्झौताका बारेमा आजै टुंगो लाग्न सक्ने बताइएको छ ।

अमेरिकामा पनि राम्रो छाप छाड्न सफल भएका रुनी खेल जीवन पछि प्रशिक्षकका रुपमा फुटबलमा सक्रिय रहने योजना बनाउँदै आएका छन् । डिसी युनाइटेडसँगको उनको सम्झौता अर्को वर्षसम्म बाँकी नै छ । तर, डर्बीसँगको प्रारम्भिक छलफलपछि उनी नयाँ भूमिकाका साथ फर्कन सक्ने विश्वास गरिएको छ ।

उनलाई जनवरीमा मात्र फर्कने सल्लाह पनि दिइएको बताइएको छ । तर उनी डिसीसँगको सम्झौतालाई अन्त्य गर्दै अहिले नै आबद्ध हुन सक्नेछन् । फ्रान्क लाम्पार्डकै जस्तो ३३ वर्षे रुनीले पनि डर्बीमा मौका पाउने सम्भावना छ । लाम्पार्डको प्रशिक्षणमा डर्बीले पछिल्लो सिजन च्याम्पियन्ससिप प्ले अफ खेलेको थियो ।

हडर्सफिल्डलाई २–१ ले हराउँदै डर्बीले यो सिजन सुखद सुरुवात गरेको छ । खेलपछि डर्बीका प्रशिक्षक फिलिप कोकुलाई सोधिएको प्रश्नमा उनको जवाफ थियो, ‘यति बेला यो विषयमा म केहि भन्न सक्दिन । हामीले एउटा टोलीका रुपमा काम गर्ने प्रयास गरेका छौं । यद्दपी यो पुरा भएको छैन ।’

बार्सिलोनाका पूर्व खेलाडी काकुले भने, ‘हामीले टोलीमा अझै केहि गर्न चाहेका छौं । तर जब सम्म केहि टुंगो लाग्दैन केहि भन्न सकिन्न । अझै केहि दिन बाँकी छ । केहि पक्कै होला ।’