एजेन्सी – इंग्ल्यान्डका राष्ट्रिय टोलीका सदस्य एवं लेस्टर सिटीका डिफेन्डर ह्यारी मगाएर विश्व फुटबलका सर्वाधिक महँगा डिफेन्डर बनेका छन् ।

म्यानचेस्टर युनाइटेड र लेस्टर सिटीबीच मगाएरको ट्रान्सफरका लागि विश्व कीर्तिमानी ८० मिलियन पाउण्ड रकमको सम्झौता भएको हो । २६ वर्षीय डिफेन्डरलाई युनाइटेडले सोमबार सार्वजनिक गरेको छ । मगाएरले क्लबसँग ६ वर्षको सम्झौता गरेका छन् । दुवै पक्षको सहमतिमा सातौं वर्षको विकल्प पनि रहेको छ ।

क्लबका प्रशिक्षक ओले गुनर सोल्सजरले मगाएर विश्व फुटबलका उत्कृष्ट डिफेन्डर मध्यका एक रहेको बताए । ‘ मगाएर विश्वकै उत्कृष्ट मध्यमा पर्दछन् । उनी हाम्रो टोलीको लागि मैदानभित्र र बाहिर नै ठिक हुने खेलाडी हुन् । उनको खेल्ने शैली र खेल बुझ्ने क्षमताले हामीलाई सहयोग गर्नेछ,’ उनले भने ।

युनाइटेडका लागि यस सिजनका तेस्रो अनुबन्धनका रुपमा रहेका मगाएर गत वर्ष इंग्ल्यान्डले विश्वकपमा उत्कृष्ट प्रदर्शन गर्दा टोलीको मुख्य डिफेन्डरका रुपमा रहेका थिए । युनाइटेडले यसअघि क्रिस्टल प्यालेसबाट आरोन वान बिसाका र स्वान्सीबाट ड्यानीएल जेम्सलाई भित्र्याइसकेको छ ।

सन् २०१७ मा हल सिटीबाट लेस्टर आएका उनले लिगमा ६९ खेल खेले । यस ट्रान्सफरसँगै मगाएर विश्व फुटबलकै सर्वाधिक महँगा डिफेन्डर बनेका छन् । यसअघि सन् २०१८ मा लिभरपुलले साउथह्याम्पटनबाट भर्जिल भान डाइकलाई ७५ मिलियन पाउण्डमा अनुबन्ध गरेको थियो ।