एजेन्सी – पछिल्लो समय ट्रान्सफर विन्डोमा युभेन्टस फरवार्ड पाउलो डिबाला म्यानचेस्टर युनाइटेड जाने व्यापक हल्ला चलेको छ । युभेन्टसले फरवार्ड रोमेलु लुकाकुलाई अनुबन्धन गर्न डिबालालाई युनाइटेड पठाउने प्रस्ताव अगाडि सारेको हो ।

कोपा अमेरिकामा सहभागिता जनाएका कारण ढिलो प्रशिक्षणमा सहभागी भएका युभेन्ट्स फरवार्ड डिबालालाई प्रशिक्षक माउरिजियो सार्रीले आफ्नो पहिलो रोजाइका टोलीसँग प्रशिक्षण गराएका छैनन् ।

प्रशिक्षक सार्रीले लुकाकु आफ्नो योजनामा रहेको खेलाडी भएकाले उनलाई कुनैपनि हालतमा अनुबन्ध गर्न क्लबलाई भनेका छन् । डिबाला भने अहिले नै क्लब छाड्ने पक्षमा छैनन् । यसक्रममा फरवार्ड क्रिस्टियानो रोनाल्डोले डिबालालाई युनाइटेड जाने सल्लाह दिएका छन् ।

रोनाल्डोले डिबालालाई युनाइटेडमा आफुले पनि राम्रो समय बिताएको र युनाइटेडले उनलाई विश्व स्तरीय खेलाडी बन्न सहयोग पुर्याउने बताएका छन् । इंग्लिस फुटबलको प्रख्यात संचार मध्यम डेली मेलका अनुसार रोनाल्डोले युभेन्टसको व्हाट्सयाप ग्रुपमा लेख्दै डिबालालाई युनाइटेड रोज्ने सल्लाह दिएका हुन् ।

रोनाल्डोले पनि आफ्नो करिअरको उडान म्यानचेस्टर युनाइटेडबाट नै सुरु गरेका थिए । पोर्चुगलको सपोर्टिङ लिस्बनबाट युनाइटेड पुगेका उनले ब्यालोन डी’ओर समेत जितेका थिए । त्यसपछि रियल म्याड्रिड पुगेका उनले आफूलाई विश्वकै अब्बल खेलाडीमा स्थापित गरेका थिए ।