एजेन्सी – इंग्ल्यान्डका राष्ट्रिय टोलीका सदस्य एवं लेस्टर सिटीका डिफेन्डर ह्यारी मगाएर विश्व फुटबलका सर्वाधिक महँगा डिफेन्डर बन्ने भएका छन् ।

म्यानचेस्टर युनाइटेड र लेस्टर सिटीबीच मगाएरको ट्रान्सफरका लागि विश्व कीर्तिमानी ८० मिलियन पाउण्ड रकमको सम्झौता भएको हो । २६ वर्षीय डिफेन्डरले केहि दिनमा नै ट्रान्सफरका सम्पूर्ण प्रक्रिया पूरा गर्ने छन् । युनाइटेडका लागि यस सिजनका तेस्रो अनुबन्धनका रुपमा आउने तयारीमा रहेका मगाएर गत वर्ष इंग्ल्यान्डले विश्वकपमा उत्कृष्ट प्रदर्शन गर्दा टोलीको मुख्य डिफेन्डरका रुपमा रहेका थिए । युनाइटेडले यसअघि क्रिस्टल प्यालेसबाट आरोन वान बिसाका र स्वान्सीबाट ड्यानीएल जेम्सलाई भित्र्याइसकेको छ ।

लेस्टरका प्रशिक्षक ब्रेन्डन रोजर्सले मगाएर युनाइटेड जान अब केहि औपचारिक प्रक्रिया मात्र बाँकी रहेको जानकारी दिए । ‘ दुवै क्लबले ट्रान्सफर रकममा सम्झौता गरिसकेका छन् । उनको अब स्वास्थ्य परिक्षण र व्यक्तिगत केहि माग मात्र पूरा हुन बाँकी रहेको अवस्था छ,’ रोजर्सले थपे, ‘उनी विशेष खेलाडी हुन् र हामीले उनलाई छाड्न चाहेका थिएनौं । युनाइटेडले लगातार प्रस्ताव राख्दापनि मगाएरले क्लबमा नै रहेर सबैलाई सहयोग गरे ।’

सन् २०१७ मा हल सिटीबाट लेस्टर आएका उनले लिगमा ६९ खेल खेले । यस ट्रान्सफरसँगै मगाएर विश्व फुटबलकै सर्वाधिक महँगा डिफेन्डर बन्ने भएका छन् । यसअघि सन् २०१८ मा लिभरपुलले साउथह्याम्पटनबाट भर्जिल भान डाइकलाई ७५ मिलियन पाउण्डमा अनुबन्ध गरेको थियो ।