काठमाडौं (हाम्रो खेलकुद)– विश्व कप छनोटको पहिलो खेलअघि नेपाली राष्ट्रिय फुटबल टोलीले माल्दिभ्ससँग मैत्रीपूर्ण खेल खेल्ने सम्भावना बढेको छ । अखिल नेपाल फुटबल संघ (एन्फा) ले विश्व कप छनोटअन्तर्गत कुवेतसँग खेलअघि माल्दिभ्ससँग मैत्रीपूर्ण खेल खेल्नका लागि प्रस्ताव गरेको छ ।

माल्दिभ्स प्रस्ताव प्रति सकारात्मक भएपनि खेल्ने नखेल्ने तय हुन बाँकी रहेको एन्फा श्रोतले बतायो । नेपाल र कुवेतबीच पहिलो लेग भदौ १९ गते हुँदैछ । त्यसको एक साता अघि मैत्रीपूर्ण खेलका लागि एन्फाले प्रयास थालेको हो ।

नेपाल र माल्दिभ्सबीच पछिल्लो पटक साफ च्याम्पियनसिपको सेमिफाइनलमा भेट भएको थियो । जहाँ नेपाल टोली पराजित भएको थियो । पछि माल्दिभ्स साफ च्याम्पियन बनेको थियो ।

विश्वकप छनोटको कुवेतसँगको पहिलो खेल नेपालले होममा खेल्नु पर्ने थियो । तर दशरथ रंगशाला तयार भइनसकेको कारण नेपालले होम म्याच पनि कुवेतमै खेल्ने प्रस्ताव गरेको हो । विश्व कप छनोटमा नेपाल, कुवतेसहित जोर्डन, चाइनिज ताइपेइ र अस्ट्रेलिया छन् ।

कुवेतपछि नेपालले चाइनिज ताइपेइसँग भदौं २४ गते खेल्नेछ । ताइपेइसँगको खेल पनि नेपालको पहिला होम नै थियो । तर नेपालले रंगशालाकै कारण पहिला अवे खेल्न प्रस्ताव गरेको हो । जोर्डनसँग असोज २८ गते होममा हुनुपर्ने पर्ने खेल पनि नेपालले पहिला अवे खेल्न प्रस्ताव गरेको छ ।