एजेन्सी – पेरिस सेन्ट जर्मेन (पिएसजी) नेयमारलाई बेच्न तयार भएको छ । तर, उनलाई बार्सिलोना नै फर्काउनेमा भने पिएसजी इच्छुक नरहेको बताइएको छ । ब्राजिलियन सुपर स्टार नेयमार फ्रान्सेली क्लबमा बस्न चाहिरहेका छैनन् ।

पिएसजीका अध्यक्ष नासिर अल खालिफा पनि खुसी नहुने खेलाडीलाई क्लबमा राख्न चाहदैनन् । कारण त्यस्ता खेलाडीका कारण ड्रेसिङ रुममा समेत असर पुग्ने उनीहरुको विश्वास छ । पिएसजी र बार्सिलोनाबीच नेयमारका विषयमा छलफल हुने र एउटा निकर्षमा पुग्ने विश्वास गरिएको छ ।

तर, अघिल्लो साता नेयमार किन्न बार्सिलोनाले राखेको १ सय ६५ मिलियन पाउन्डको प्रस्तावलाई पिएसजीले अस्वीकार गरेको बताएको छ । बार्सिलोनासँगको खराब सम्बन्धका कारण पिएसजी नेयमारलाई त्यहाँ बेच्न तयार नभएको बताइएको छ ।

अन्य क्लबले इच्छा देखाएको खण्डमा पिएसजीले नेयमारलाई बेच्ने सम्भावना रहेको छ । बार्सिलोनाले इभान राकटिक, ओसमाने डेम्बेले र समुइल इटिटी जस्ता खेलाडीहरु दिएर नेयमार लिने विषयलाई तत्कालका लागि स्थगित गरेको छ । पिएसजीले पनि खेलाडी सट्टा पट्टा गर्नेमा खासै रुची देखाएन ।

पिएसजीको मागलाई पुरा गर्ने बार्सिलोनासँग आर्थि अवस्था रहने नरहेको पनि निश्चित छैन । स्पेनिस च्याम्पियनले सिजनको सुरुवातमा एन्टोनी ग्रिजमनलाई १ सय ८ मिलियन पाउन्डमा खरिद गरेको थियो । नेयमारलाई पुनः क्लबमा भित्राउँदा अनेक समस्या आउन सक्ने अनुमानका साथ बार्सिलोना पनि उनलाई लिनेमा अझै पक्का हुन नसकेको बताइन्छ ।