एजेन्सी – पछिल्लो समय युभेन्ट्स र म्यानचेस्टर युनाइटेडबीच दुवै टोलीका फरवार्ड किनबेचलाई लिएर ट्रान्सफर बजारमा हलचल जारी छ । यसक्रममा युभेन्ट्सले युनाइटेडका रोमेलु लुकाकुलाई अनुबन्धन गर्न अर्को प्रस्तावको तयारी गरेको छ ।

अर्को इटालियन क्लब इन्टर मिलानले लगातार युनाइटेडसँग लुकाकुको अनुबन्धनलाई लिएर प्रयास जारि राख्दा युभेन्टसले आफ्नो टोलीका फरवार्ड पाउलो डीबालालाई समेट्दै अनुबन्धन प्रस्ताव गर्ने भएको हो । युभेन्टसले डीबालाको भाउ १ सय मिलियन युरो रहेको भन्दै अर्को इंगलिस क्लब टोटेनहमको प्रस्ताव नकारीरहेको अवस्थामा लुकाकुलाई भित्र्याउन भने खेलाडी साटासाटका लागि तयार रहेको बुझिएको छ । टोटेनहमले डीबालाका लागि ६० मिलियन युरोको प्रस्ताव गरेपनि युभेन्टसले नकारेको थियो ।

यता इन्टर मिलानले लगातार लुकाकुलाई अनुबन्धन गर्न प्रयास जारि राखेको छ । पछिल्लो समय प्रि सिजनका कुनै खेल नखेलेका लुकाकु क्लब छाड्ने लगभग पक्का देखिएको छ । इन्टरले यसै साता गरेको ५४ मिलियन पाउण्डको प्रस्ताव पनि युनाइटेडले स्वीकार गरेको छैन । यदि युभेन्टसले डीबालासहित प्रस्ताव गरेको खण्डमा युनाइटेडले पनि उक्त प्रस्ताव स्वीकार्ने सम्भावना प्रबल छ ।

इन्टरले पनि लुकाकु नआएको खण्डमा पेरिस सेन्ट जर्मेनका एडिन्सन काभानी वा एएस रोमाका एदीन जेकोलाई लाई ल्याउने प्रयास थाल्ने बुझिएको छ । माउरो इकार्डीलाई प्रशिक्षक एन्टोननियो कोन्टेले टोलीमा नराख्ने निर्णय लिएपछि इन्टर हाल फरवार्डको खोजीमा छ ।