एजेन्सी – एल्क्सिस सान्चेज म्यानचेस्टर युनाइटेडको प्रि सिजन टोलीमा सामेल भएका छन् । कोपा अमेरिकामा सहभागी भएका सान्चेज त्यसपछि आराम गरिरहेका थिए । उनको टोली चिली कापा अमेरिकाको सेमिफाइनलमा पेरुसँग र तेस्रो स्थानको खेलमा अर्जेन्टिनासँग पराजित भएको थियो ।

ब्राजिलमा भएको कोपा अमेरिकामा सान्चेज निकै लयमा थिए । उनलाई त्यहि चुनौति युनाइटेडबाट देखाउने दबाब छ । १८ महिना अघि आर्सनलबाट युनाइटेड गएयता उनको प्रदर्शन बिर्सन लायक रहँदै आएको छ ।

उनले युनाइटेडका लागि ४५ खेलमा मात्र ५ गोल गरेका छन् ।
सान्चेजसँगै टोलीका स्टार खेलाडी डेभिड डी जिया, भिक्टोर लिन्डेलोफ र नयाँ खेलाडी डानियल जेम्स पनि अभ्यासमा सामेल भएका छन् ।

कोपा अमेरिकामा सान्चेजले गरेको प्रदर्शन युनाइटेडका प्रशिक्षक ओले गुनास सोल्सेजरका लागि राहतको विषय हुन सक्दछ । निकै आशा गरेर युनाइटेड भित्राइएपनि उनी त्यसमा खरो उत्रन सकेका छैनन् ।

यदि उनले चिलीको प्रदर्शनलाई युनाइटेडमा दोहोराउने हो उनी ओल्र्ड ट्राफर्डका नायक बन्नेछन् । प्रि सिजनअन्तर्गत अस्ट्रेलिया र एसियाका भम्रणका दौरान युनाइटेडले सबै चार खेल जितेको थियो । पर्थ ग्लोरीलाई २–० ले हराएको युनाइटेडले लिड्सलाई ४–० ले पराजित गर्यो ।

त्यसपछि इन्टरनेसनल्स च्याम्पियन्स कपमा टोलीले इन्टर मिलानलाई १–० र प्रिमियर लिग प्रतिद्वन्द्वि टोटेनह्यामलाई २–१ ले हराएको थियो । युनाइटेडले मंगलबार क्रिस्टिसन्डको सामना गर्नेछ भने वेल्समा एसी मिलानसँग खेल्दै प्रि सिजनको अन्त्य गर्नेछ ।