एजेन्सी – च्याम्पियन्स लिग विजेता इंग्लिस क्लब लिभरपुलले प्रि सिजनको मैत्रीपूर्ण खेलमा जर्मन क्लब डर्टमन्डसँग हार बेहोरेको छ ।

निकै नै प्रतिस्पर्धात्मक बनेको खेलमा लिभरपुल बोरुसिया डर्टमन्डसँग ३–२ को अन्तरमा पराजित भएको हो । प्रि सिजनमा लिभरपुलको यो पहिलो हार हो । यसअघि लिभरपुलले दुई खेलमा फराकिलो जित निकालेको थियो । डर्टमन्डको भने प्रि सिजनमा लगातार तेस्रो जित निकालेको हो ।

लिभरपुललाई पराजित गर्न डर्टमन्डका पाको अल्कासेर, थोमस डिलेनी र जाकव ब्रन लार्सेनले गोल गरे । लिभरपुलका ह्यारी विल्सन र रिहान ब्रिस्टरले गोल गरे । खेलको तेस्रो मिनेटमा नै डर्टमन्डले पाको अल्कासेरको गोलबाट अग्रता लिएको थियो । ३५औं मिनेटमा ह्यारी विल्सनले गोल गरेपछि पहिलो हाफ १–१ गोलको बराबरीमा सकिएको थियो ।

५३औं मिनेटमा थोमसले गोल गर्दै डर्टमन्डलाई पुनः २–१ को अग्रता दिलाए । ५८औं मिनेटमा जाकवले गोल गर्दै डर्टमन्डलाई जितनजिक पुर्याएका थिए । ७५औं मिानेटमा रिहानले पेनाल्टीमा गोल गर्दै लिभरपुललाई खेलमाा फर्काउन संकेत दिएको थियो । तर, त्यसपछि थप गोल निस्कन नसक्दा डर्टमन्ड ३–२ ले विजयी हुदा लिभरपुल पराजित हुन पुग्यो ।

अब डर्टमन्डले अर्काे मैत्रीपुर्ण खेलमा उडिनेसीसँग तथा लिभरपुलले सेभियासँग २२ जुलाईमा खेल्दैछ ।