एजेन्सी – युवा डिफेन्डर म्याथिस डे लिग्टले डच क्लब आयाक्सबाट इटालियन क्लब युभेन्ट्स पुगेपछि क्लबले देखाएको विश्वासका कारण निर्णय लिन सहज भएको बताएका छन् ।

गत सिजन आयाक्सबाट उत्कृष्ट प्रदर्शन गरेपछि डी लिग्टलाई युरोपका शीर्ष क्लबले अनुबन्धन गर्न प्रतिस्पर्धा नै गरेका थिए । म्यानचेस्टर युनाइटेड, बार्सिलोना, पेरिस सेन्ट जर्मेन लगायत शीर्ष क्लबलाई पछि पार्दै युभेन्टसले ६७ मिलियन पाउण्डको मोटो रकम खर्चेर उनलाई अनुबन्ध गरेको हो । यसक्रममा डी लिग्ट क्लबमा रोनाल्डोपछि सर्वाधिक कमाउने खेलाडी पनि बने । उनलाई इटालियन क्लबको तुलनामा अन्य क्लबले धेरै तलबको प्रस्ताव राखेपनि उनले युभेन्टस नै रोजेको बताएका छन् ।

‘मैले युभेन्टस नै रोज्न सहज थिएन । मसँग धेरै विकल्प थियो र कुन सहि हो भन्ने निर्णय गर्न पनि कठिन । यसमा धेरै पक्षले फरक पार्थ्यो तर मेरो लागि मलाई क्लबले कति विश्वास गर्छ भन्ने महत्त्वपूर्ण थियो । मैले कति खेल्न पाउँछु र मेरो भूमिका के हुन्छ भन्ने युभेन्टसले प्रष्ट पार्यो,’ उनले सुनाए ।

‘ म मेरो बाल्यकालदेखि नै इटालीको डिफेन्सबाट प्रभावित थिएँ । मैले आदर्श मान्ने खेलाडी पाओलो माल्डिनी, फ्रान्को बारेसी, एलेसान्द्रो नेस्टा, फाबियो कानभारो लगायत इटालीमा खेलेर विश्वस्तरीय बने । त्यसैले एक डिफेन्डरको हिसाबले यहि उचित निर्णय हुन्छ भन्ने मलाई लाग्यो, ‘ १९ वर्षीय डे लिग्टले थपे ।