एजेन्सी – ब्राजिलका स्टार फरवार्ड नेयमारले फ्रान्सेली च्याम्पियन पेरिस सेन्ट जर्मेन (पीएसजी) छाड्ने निर्णयमा अडिग रहेको जनाउँदै युरोपका ठूला क्लबसामू आफ्नो प्रस्ताव अगाडि बढाएका छन् ।

बार्सिलोना जाने हल्ला चलेपनि क्याटलान क्लबले एन्टोइन ग्रिज्मनलाई अनुबन्धन गर्न १ सय २० मिलियन युरो खर्चेपछि नेयमार आफ्नो पूर्वक्लब फर्कने सम्भावना कम भएको हो । बार्सिलोनाले ट्रान्सफर रकम मात्र नभएर टोलीमा सन्तुलन नहुने कारण पनि नेयमारलाई अनुबन्धन गर्नबाट पछाडि हटेको बुझिएको छ । बार्सिलोना जाने इच्छा व्यक्त गरेका नेयमारले उक्त प्रक्रिया सम्भव नभएपनि पीएसजी भने छाड्ने बताएका छन् ।

स्पेनी संचार मध्यम मुन्दो डेपोरटिभोका अनुसार नेयमारले पछिल्लो केहि दिनयता युरोप ठूला क्लब म्यानचेस्टर युनाइटेड, युभेन्ट्स, बायर्न म्युनिख, रियल म्याड्रिड लगायत क्लबमा आफैं सम्पर्क बढाएका छन् । उनले बार्सिलोना जाने सम्भावना कम देखेपछि पीएसजी छाड्ने प्रक्रिया सफल पार्न आफूलाई अन्य क्लबसमक्ष प्रस्तुत गरेका हुन् ।

बार्सिलोना र पीएसजीबीच पछिल्लो पटक नेयमारको ट्रान्सफरलाई लिएर भएको मतभेदका कारण पनि नेयमारको ट्रान्सफर सम्भव नहुने देखिएको हो । बार्सिलोनाले नेयमारको प्रस्थानपछि थियागो सिल्भा, मार्को भेराट्टी, आड्रीएन राबीओट लगायत खेलाडीलाई अनुबन्ध गर्ने प्रयास गरेपनि पीएसजीले त्यसलाई सफल हुन दिएन । पीएसजीले नेयमारलाई अनुबन्ध गर्न बार्सिलोनाले ३ सय मिलियन युरोको रिलिज कलज तिर्नुपर्ने माग राखेको छ । एटलेटिकोलाई नै १ सय २० मिलियन तिर्न धौधौ परेको बार्सिलोनालाई नेयमारको ट्रान्सफर भने सम्भव हुने देखिँदैन ।