एजेन्सी – इंग्लिस क्लब म्यानचेस्टर सिटीका फरवार्ड रियाद महारेजले इन्ज्युरी समयमा फ्रिकिकमार्फत निर्णायक गोल गरेपछि अल्जेरिया अफ्रिका कप अफ नेसन्सको फाइनलमा प्रवेश गरेको छ ।

महारेजले इन्ज्युरी समयको थप गरिएको पाँचौ मिनेटमा फ्रिकिकमा दर्शनीय गोल गरेपछि अल्जेरियाले सेमिफाइनलमा नाईजेरियालाई २–१ ले पराजित गर्दै उपाधिनजिक पुगेको हो ।

कायरो इन्टरनेसनल स्टेडियमममा आइतबार राति भएको खेलको ४० औ मिनेटमा विलियम ट्रोस्ट इकोङको आत्मघाती गोलबाट अल्जेरियाले पहिलो हाफमा अग्रता लिएको थियो ।

७२औ मिनेटमा ओडियन इग्लुले पेनाल्टीमा गोल गर्दै नाइजेरियालाई खेलमा फर्काएका थिए । तर अतिरिक्त समयतर्फ धकेलिन लागेको खेलको इन्ज्युरी समयको अन्तिम मिनेटमा महारेजले फ्रिकिक मार्फत गोल गर्दै नाइजेरियालाई २–१ ले स्तब्ध पार्दै उपाधि नजिक पुर्याए ।

अल्जेरियाले अब उपाधिका लागि सेनेगलसंग प्रतिस्पर्धा गर्नेछ । फाइनल शुक्रबार हुनेछ ।

सेनेगलले ट्युनेसियालाई हराउँदै फाइनल प्रवेश गरेको हो । सेमिफाइनलमा ट्युनिसियालाई अतिरिक्त समयमा १-० गोल अन्तरले पराजित गर्दै सेनेगल उपाधि नजिक पुगेको हो ।

खेलको निर्धारित ९० मिनेट गोलरहित बराबरीमा सकिएपछि खेल अतिरिक्त समयमा गएको थियो । अतिरिक्त समयमा सेनेगलले आत्मघाती गोलको उपहार पाउँदै फाइनलमा स्थान बनायो । १०१ औं मिनेटमा ट्युनिसियाका ड्यलान ब्रोनले आत्मघाती गोल गरेका थिए । सेनेगलको जितमा उक्त गोल नै निर्णायक बनेको थियो ।

खेल अतिरिक्त समयमा जानुअघि दुवै टोलीले पेनाल्टीमा गोल गर्न सकेनन् । खेलको ७५ औं मिनेटमा ट्युनिसियाका फेर्जानी सास्सीले तथा ८१औं मिनेटमा सेनेगलका हेनरी सैभेटले पेनाल्टीमा गोल गर्न सकेनन् ।