एजेन्सी – फ्रान्सेली क्लब पेरिस सेन्ट जर्मेन (पीएसजी) का स्टार फरवार्ड नेयमारले आफू बार्सिलोनाबाट खेल्दा च्याम्पियन्स लिगमा पीएसजीलाई हराएको खेल हालसम्मकै उत्कृष्ट रहेको बताएका छन् ।

सन् २०१६-१७ को च्याम्पियन्स लिगको राउन्ड अफ १६ चरणमा बार्सिलोनाले अविश्वसनीय पुनरागमन गर्दै पीएसजीलाई पराजित गरेको थियो । पहिलो लेगमा पीएसजी ४-० ले विजयी रहेपछि अर्को चरणमा पुग्ने लगभग पक्का देखिएको थियो । तर दोस्रो लेगमा बार्सिलोनाले ६-१ को जित दर्ता गर्दै समग्रमा ६-५ को जितसँगै क्वाटरफाइनलमा पुगेको थियो । उक्त खेलमा नेयमारले मुख्य भूमिका निर्वाह गरेका थिए । उनले १ फ्रिकिक र १ पेनाल्टी गोलसँगै अन्तिम मिनेटमा सर्जी रोबर्टोको गोलमा असिस्ट दिएका थिए ।

नेयमार सन् २०१७ मा विश्व कीर्तिमानी ट्रान्सफरमा पीएसजी पुगेका थिए । पछिल्लो समय पीएसजीसँग मनमुटाव बढेपछि उनी बार्सिलोना फर्कने हल्ला चलेको छ । यसक्रममा नेयमारले आफूले हाल खेलिरहेको क्लबविरुद्ध जित हात पारेको खेललाई आफ्नो उत्कृष्ट खेल रहेको बताए । ‘मेरो जीवनको उत्कृष्ट खेल भनेको बार्सिलोनाबाट खेल्दा पीएसजीविरुद्ध कम्ब्याक हो । जब हामीले छैटौं गोल गर्यौं, त्यो बेलाको अवस्था मैले शब्दमा बयान गर्न सक्दिन । म पागल जस्तै भएको थिएँ । त्यो मेरो करिअरको उत्कृष्ट क्षण हो,’ नेयमारले भने ।

नेयमारले गत साताबाट सुरु भएको पीएसजीको प्रशिक्षणमा सहभागी नभएपछि क्लबले उनलाई कारवाही समेत गरेको छ । नेयमारले अब सिजनको सुरुवातअघि बार्सिलोना जाने नजाने निर्णय भने केहि दिनमा नै लिनुपर्ने छ ।