काठमाडौं (हाम्रो खेलकुद) – थाइल्यान्ड खुला कराते च्याम्पियनसिपमा भाग लिइरहेका नेपाली राष्ट्रिय कराते टोली र राष्ट्रिय फुटबल टोलीका फरवार्ड भरत खवासबीच आइतबार भेटघाट भएको छ ।

च्याम्पियनसिपको अन्तिम दिन कराते टोलीलाई भेट्न भरत आयोजना स्थल पुगेका थिए । त्रिभुवन आर्मी क्लबका कप्तान एवंम राष्ट्रिय टोलीका उपकप्तान भरत सैन्य तालिमका लागि जेठ ३२ गते थाइल्यान्ड प्रस्थान गरेका थिए ।

सेनाका लेफ्टिनेन्ट रहेका भरत तीन महिने फ्लाइट डिसप्याचर र फ्लाइट अपरेसन अफिसर तालिमका लागि थाइल्यान्ड गएका हुन् । उनले सिभिल एभिएसन ट्रेनिङ सेन्टरमा तालिम लिइरहेका छन् । भरतले चोटका कारण पछिल्लोपटक मलेसिया र चाइनिज ताइपेईविरुद्धको खेल गुमाएका थिए ।

नेपालले विश्वकप छनोट अन्तर्गत नेपालले सेप्टेम्बरदेखि दोस्रो चरणको छनोटअन्तर्गत प्रतिस्पर्धा गर्नेछ । विश्वकप छनोटको समूह ड्र जुलाईमा हुनेछ । भरत विश्वकप छनोटका लागि नेपाल आइपुग्ने छन् ।

आइतबार सकिने च्याम्पियनसिपमा नेपालले शनिबार १ रजत र १ कास्य पदक जितेको छ । स्वेदशमा आयोजना हुने १३ औं दक्षिण एसियाली खेलकुदको विशेष प्रशिक्षणमा रहेको कराते टोलीका सदस्य मन्देकाजी श्रेष्ठले एकल काता र महिला टोलीले कास्य पदक जितेको छ ।

आठौं राष्ट्रिय खेलकुदका स्वर्ण पदक विजेता मन्देले फाइनलमा भने थोरै अंकले स्वर्ण पदक जित्नबाट बञ्चित रहे । स्वर्ण पदक विजेता इन्डोनेसियाका खेलाडीले २०.३६ स्कोर गरे भने मन्देले २०.२० स्कोर गरेका थिए । त्यसअघि पहिलो, दोस्रो र तेस्रो चरणमा भने मन्दे शीर्षस्थानमा रहन सफल भएका थिए ।

निर्मला तामाङ, कोपिला विष्ट र सरु कार्की सम्मिलित महिला टोलीले टिम कातामा कास्य पदक जितेको छ । नेपालले २२.८८ अंकका साथ कास्य पदक पक्का गरेको हो । नेपालसँगै ब्रुनाईले पनि कास्य पदक जितेको टिम कातामा चीनले स्वर्ण तथा म्यानमारले रजत पदक जितेको थियो ।