एजेन्सी – प्रशिक्षक जिनेदिन जिदानले स्पेनिस क्लब रियल म्याड्रिडलाई प्रि सिजनमा प्रशिक्षण नदिने भएका छन् ।

प्रि–सिजनका लागि खेलाडीसँगै मोन्टरियल पुगेका जिदान व्यक्तिगत कारण देखाउदै स्पेन फर्किएका छन् । फ्रान्सका ४७ वर्षीय जिदान प्रि–सिजनको इन्टरनेसनल च्याम्पियन्स कपका लागि टिमसँगै एक साताअघि क्यानडा पुगेका थिए ।

अब रियललाई जिदान नफर्किएसम्म सहायक प्रशिक्षक डेभिड बेटोनीले प्रशिक्षण दिनेछन् । रियलले प्रि–सिजनको पहिलो खेलमा २१ जुलाईमा जर्मन क्लब बायर्न म्युनिखसँग खेल्दैछ । त्यसपछि इंग्लिस क्लब आर्सनल र शहरी प्रतिद्धन्द्धी एट्लटिको मड्रिडसँग खेल्ने तालिका छ । त्यसपछि स्पेनिस जाइन्ट रियलले औडी कपमा इंग्लिस क्लब टोटेनहम हस्टपरसँग खेल्दैछ ।

अघिल्लो सिजन निकै खराव प्रदर्शन गरेको रियल यो सिजन सबै उपाधि जित्ने लक्ष्यमा रहेको छ । त्यसैका लागि यो सिजन रियलले खेलाडी अुनबन्धमा मोटो रकम खर्चिएको छ । रियलले १५० मिलियन पाउन्डमा बेल्जियम तथा इंग्लिस क्लब चेल्सीका इडेन हजार्ड, फरवार्ड लुका जोभिक र रोड्रिगोलाई अनुबन्ध गरेको छ ।

यस्तै डिफेन्डर फरल्यान्ड मेन्डी र इडर मिलिटाओलाई अुनबन्ध भइसकेका छन् । अन्य खेलाडी पनि रियलले अनुबन्ध गर्ने प्रयास गरिरहेको छ ।