एजेन्सी – ब्राजिलियन फरवार्ड नेयमार सोमबारदेखि सुरु भएको प्रशिक्षणमा सहभागी नभएपछि फ्रान्सेली क्लब पेरिस सेन्ट जर्मेन (पीएसजी) ले असन्तुष्टि व्यक्त गर्दै विज्ञप्ति जारी गरेको छ ।

नेयमारले सिजन सकिएलगत्तै पीएसजी छाडेर बार्सिलोना फर्कने इच्छा व्यक्त गरेका थिए । तर दुई क्लबबीच सहमति नहुँदा उनको बार्सिलोना फर्कने इच्छा पूरा हुन सकेको छैन । पीएसजीले नेयमारले क्लबको नियमको अटेर गर्दै प्रशिक्षणमा सामेल नभएपछि कारवाही हुनसक्ने बताएको छ ।

क्लबको विज्ञप्तिमा उल्लेख छ, ‘सोमबार, जुलाई ८ तारिखको दिन क्लबले नेयमारलाई अन्य खेलाडीझैं नयाँ सिजनको सुरुवातका लागि क्लबमा बोलाएको थियो । क्लबले नेयमारलाई तोकिएको स्थान र समयमा उपलब्ध नभएको र यसबारे पूर्वजानकारी पनि क्लबले पाएको छैन । यस स्थितिको क्लब निन्दा गर्दै उचित कारवाही अगाडी सारिने प्रष्ट पार्न चाहन्छ ।’

नेयमार यसै साता ब्राजिलले कोपा अमेरिका २०१९ जित्दा ब्राजिलमा नै थिए । उनले मैदानमा नै पुगेर फाइनल खेल हेरेका थिए । वार्मअप खेलका दौरान चोट बोकेपछि प्रतियोगिता गुमाएका नेयमारले क्लबमा भने छिट्टै फर्कने अपेक्षा गरिएको थियो । तर उनी व्यक्तिगत कार्यमा व्यस्त रहेकाले प्रशिक्षणमा आउन नसकेको बुझिएको छ ।

नेयमारकै नाममा स्थापित रेड बुल नेयमार जुनियर – ५ ए साइड प्रतियोगिताको अन्तिम चरण शुक्रबार र शनिबार ब्राजिलमा हुँदैछ । नेयमारले उक्त कार्यक्रम सकेपछि मात्र क्लब फर्कने बुझिएको छ ।