एजेन्सी – इटालियन क्लब युभेन्टसका गोलरक्षक जियानलुइजी बुफोनले पोर्चुगिज फरवार्ड क्रिस्टियानो रोनाल्डोसँग खेल्न पाउनु उत्कृष्ट उपहार रहेको बताएका छन् ।

यसै साता फ्रान्सेली क्लब पेरिस सेन्ट जर्मेन (पीएसजी) छाडेर युभेन्टस फर्किएका बुफोनले गत सिजन फ्रान्सेली लिगको उपाधि जितेका थिए । पीएसजीले उनलाई क्लबमा नै रहने प्रस्ताव राखेपनि उनले युभेन्टस फर्कने निर्णय गरेका हुन् । उनले १७ वर्ष क्लबमा बिताउँदै थुप्रै सफलता हात परेका थिए । बुफोनले करिअरको अन्त्य इटालीमा नै गर्ने निर्णय लिएका हुन् ।

इटालीको राष्ट्रिय टोलीबाट संन्यास लिइसकेका ४१ वर्षीय गोलरक्षक बुफोनले एक वर्षको लागि सम्झौता गरेका छन् । उनले अनुबन्धपछि पत्रकार सम्मेलनमा बोल्ने क्रममा रोनाल्डोसँग खेल्न उत्साहित रहेको बताए ।

‘यो एकदम सुन्दर अवसर हो । मैले गत सिजन नेयमार र एम्बाप्पेसँग खेल्न पाएँ । अब रोनाल्डोसँग खेल्ने अवसर दिएकोमा म युभेन्टसलाई धन्यवाद दिन चाहन्छु,’ उनले थपे, ‘ मैले फुटबलमा लामो समय खेल्दै निकै अनुभव बटुलेको छु । ऐतिहासिक करिअरको अन्त्यमा उत्कृष्ट उपहार पाएको महसुस भएको छ ।’

बुफोन गत सिजन क्लब छाड्नुअघि टोलीको कप्तान रहेका थिए । सन् २०१२ मा एलेसान्ड्रो डेल पिएरोले क्लब छाडेपछि कप्तानी सम्हालेका उनलाई जिओर्जियो किएलिनिले कप्तान बन्न आग्रह गरेपनि उनले नकारेका थिए । यस्तै गोलरक्षक वोजचिएक सेचेज्नीले राखेको १ नम्बर जर्सीको प्रस्ताव पनि उनले नकारे ।

‘म यहाँ आफ्नो तर्फबाट सक्दो मिहिनेत गरेर केहि योगदान दिन आएको हुँ । अरुको भाग खोस्ने मेरो मनसाय छैन । किएलिनी मेरो भाइ हुन् र कप्तानी गर्नेछन्,’ उनेल थपे, ‘युभेन्टसका पहिलो रोजाइका गोलरक्षकले १ नम्बर जर्सी लगाउनेछन् । मैले ७७ नम्बर जर्सी पार्मा छँदा लगाएको कारण फेरी त्यहि प्रयोग गर्नेछु ।’