एजेन्सी – नेदरल्यान्डका पुर्व खेलाडी तथा जर्नन क्लबका बायर्न म्युनिखका महान खेलाडी आर्जेन रोवेनले व्यवसायिक खेल जीवनबाट सन्न्यासको घोषणा गरेका छन् ।

३५ वर्षीय रोवेनले सन् २०१७ मै राष्ट्रिय टोलीबाट सन्न्यासको घोषणा गरेका थिए । त्यसयता क्लब फुटबलमा सक्रिय रहेका रोवेनले बिहीबार सम्पुर्ण व्यवसायिक खेल जीवनबाट सन्न्यासको घोषणा गरेका हुन् । रोवेनले बायर्न म्युनिखबाट ८ बुन्डेसलिगा उपाधि जितिसकेका छन् ।

सन् २००४ मा लन्डन क्लब चेल्सीमा आबद्ध भएका रोवेन त्यसपछि विश्व फुटबलमा उनी उदाएका थिए । उनी टोलीमा रहँदा चेल्सीले सन् २००४/०५ र २००५/०६ को सिजनमा लगातार प्रिमियर लिगको तथा एफए कपको उपाधि जितेका थिए । उनले दुई सिजन रियलमा बिताउदै २००९/१० मा जर्मनी पुगेका थिए ।

१९ वर्षको उमेरमा ग्रोनिइनको सिनियर टोलीबाट खेल्न शुरु गरेका रोवेनले १६ वर्ष व्यवसायिक खेल जीवनमा बिताए ।

उनले पीएसभी, चेल्सी, रियल म्याड्रिड र बायर्न चारै क्लबबाट उपाधि जितेका छन् । उनले आफ्नो खेल करियरको ४२० खेलमा १५१ गोल गरेका छन् । राष्ट्रिय टोलीबाट रोवेनले ९६ खेलमा ३७ अन्तर्राष्ट्रिय गोल गरेका छन् । २९ गोलको लागि सहायता गरेका छन् ।

रोवेनले तीन विश्वकप र तीन युरोकप खेलिसकेका छन् । रोवेनकै उच्च प्रदर्शनमा नेदरल्याण्ड सन् २०१० को विश्वकपमा फाइनलसम्म पुग्न सफल भएको थियो । त्यतिबेला नेदरल्याण्ड स्पेनसँग अतिरिक्त समयमा १–० ले पराजित भएको थियो ।