एजेन्सी – स्पेनिस क्लब एट्लेटिको म्याड्रिडले पोर्चुगिज युवा सनसनी जोआ फेलिक्सलाई ७ नम्वर जर्सी प्रदान गर्ने भएको छ ।

क्लबले यसै सिजन एन्टोइन ग्रिजमनले क्लब छाड्ने घोषणा गरेसँगै उनलै लगाउने ७ नम्वर जर्सी प्रदान गर्ने निर्णय गरेको हो ।

स्पेनिस क्लब एट्लेटिको म्याड्रिडले पोर्चुगलका १९ वर्षीय युवा स्टार जोआ फेलिक्सलाई कीर्तिमानी मुल्य १ सय १४ मिलियन पाउन्डमा क्लबमा अनुबन्ध गरेको हो । क्लब र जोआले ७ वर्ष २०२६ जुन सम्म सम्झौता गरेक हुन् ।

क्लबले सामाजिक सन्जाल ट्वीटरमा एक भिडियो सार्वजनिक गर्दै १९ वर्षे मिडफिल्डरलाई स्वागत गरेको छ । सो भिडियोको क्याप्सनमा ‘स्वागतम जोआ फेलिक्स, उत्कष्ट खेलाडी’ लेखेर पोर्चुगिज स्टारलाई क्लबमा अनुबन्धन गरेको जनाएको छ ।

खेलाडी सरुवा बजारमा जोआले पाएको रकम क्लब फुटबलकै पाँचौ ठुलो रकम हो । यसअघि नेयमार, केलियन एम्बाप्पे, फिलिप काउटिन्हो र उसमान डेम्बेले सर्वाधिक मुल्यमा किनिएका थिए ।
युवा फुटबलरको सरुवा बजारमा यो दोस्रो ठुलो रकम हो ।

गत वर्ष फ्रान्सेली फुटबलर केलियन एम्बाप्पेलाई पेरिस सेन्ट जर्मेन पीएसजीले १ सय ६५ मिलियन युरोमा अनुबन्धन गरेको थियो ।

जोआले गत सिजनको घरेलु लिगको ४३ खेलमा २० गोल गर्दै युरोपका ठुला क्लबको नजर आफुमा खिच्न सफल भएका थिए । यो सिजन एट्लेटिकोबाट कप्तान डिएगो गोडिन, जुवान फ्रान, रोड्री र ग्रिजमनले क्लब छाडिसकेका छन् ।