एजेन्सी – स्पेनिस क्लब एटलेटिको म्याड्रिडले पोर्चुगिज फरवार्ड जोआओ फेलिक्सलाई अनुबन्ध गरेको छ । एटलेटिकोले बेन्फिकालाई १ सय २६ मिलियन युरो तिर्दै फेलिक्सलाई विश्वकै पाँचौ महँगो ट्रान्सफर रकममा अनुबन्ध गरेको हो ।

पोर्चुगलको राष्ट्रिय टोलीबाट खेलिसकेका १९ वर्षीय फेलिक्सको रिलिज कलज १ सय २० मिलियन युरो भएपनि एटलेटिकोले किस्तावन्दीमा उक्त रकम तिर्ने सर्तमा ६ मिलियन बढी खर्चेको हो । फेलिक्सले एटलेटिकोमा ७ वर्षको सम्झौता गरेका छन् । उनले क्लबमा ७ नम्बर जर्सी प्रयोग गर्नेछन् । यसअघिका सिजनमा फरवार्ड एन्टोइन ग्रिज्मनले उक्त जर्सी प्रयोग गरेका थिए ।

यस ट्रान्सफरसँगै फेलिक्स विश्व फुटबलका दोस्रा महँगा टिनएज खेलाडी पनि बनेका छन् । सन् २०१८ मा पेरिस सेन्ट जर्मेन (पीएसजी) ले एएस मोनाकोबाट किलियन एम्बाप्पेलाई अनुबन्ध गर्न १ सय ८० मिलियन युरो खर्चेको थियो ।

उनी समग्रमा भने नेयमार, एम्बाप्पे, फिलिपे कोउटिन्हो र ओस्मान डेम्बेलेपछि पाँचौ महँगा खेलाडी बनेका छन् । यसअघि रियल म्याड्रिडले म्यानचेस्टर युनाइटेडबाट क्रिस्टियानो रोनाल्डोलाई विश्व कीर्तिमानी रकममा अनुबन्ध गरेको थियो । फेलिक्सले उनलाई पनि उछिनेका छन् ।

एटलेटिकोले शुक्रबारनै पोर्चुगिज क्लब पोर्टोबाट अन्य दुई खेलाडीको पनि आगमनको पुष्टि गरेको छ । मिडफिल्डर हेक्टर हरेरा फ्री ट्रान्सफरमा आएका छन् भने सेन्टर डिफेन्डर फिलिपे २० मिलियन युरोमा एटलेटिको आएका छन् । यसबीचमा २३ वर्षीय मिडफिल्डर रोड्री भने इंग्लिस च्याम्पियन म्यानचेस्टर सिटी लागेका छन् । सिटीले उनको रिलिज क्लज बराबरको रकम तिरेपछि रोड्रीले क्लब छाडेको क्लबले जनाएको छ ।