एजेन्सी – इंग्ल्यान्डलाई स्तब्ध पार्दै अमेरिका महिला विश्वकपका फाइनलमा प्रवेश गरेको छ । अन्तिम समयमा प्राप्त पेनाल्टी चुकाएपछि इंग्ल्यान्ड अमेरिकासँग २–१ ले पराजित हुदै विश्वकप सेमिफाइनलबाटै बाहिरिएको छ ।

मंगलबार राति भएको निकै नै प्रतिस्पर्धात्मक खेलमा सबै ३ गोल पहिलो हाफमा सम्भव भएको थियो । खेलको १०औं मिनेटमा क्रिस्टियन प्रेसको गोलबाट अमेरिकाले सुरुवाती अग्रता बनाएको थियो । उनले केली ओ हाराको पासलाई सदुपयोग गरेकी थिइन् ।

तर, अमेरिकाको त्यो अग्रता लामो समय टिकेन । १९औं मिनेटमा इलेन ह्वाइटले बेथानी मिडको पासमा बराबरी गोल फर्काएकी थिइन् । ३१औं मिनेटमा एलेक्स मोगार्नले गोल गर्दै अमेरिकालाई पुनः २–१ को अग्रता दिलाइन् । उनले लिन्डसे होरानको पासलाई सदुपयोग गरेकी थिइन् ।

दोस्रो हाफमा पनि दुवै टोलीले गोलको मौका पाएको थियो । ६७औं मिनेटमा इंग्ल्यान्डले बराबरी गोल गरेपनि भिएआरको सहायतामा जिल स्कटको गोल अफसाइड बन्यो ।

८४औं मिनेटमा इंग्ल्यान्डले बराबरी गोल गर्ने सुन्दर मौका खेर फाल्यो । विकीले विपक्षी खेलाडीलाई पेनाल्टी बक्समा लडाएपछि प्राप्त पेनाल्टीलाई स्टेफनी होउटनले गोल गर्न सकिनन् । उनको पेनाल्टी अमेरिकी गोलरक्षक अलयासा नेइहरले बचाउदै सम्भावित बराबरी टारिन् ।

त्यसको दुई मिनेटपछि इंग्ल्यान्ड १० खेलाडीमा समेटियो । मिली ब्राइट दोहोरो रातो कार्ड खादै मैदानबाट बाहिरिएपछि इंग्ल्यान्डको खेलमा फर्कने सम्भावना सकिएको थियो ।

अर्काे सेमिफाइनलमा आज राति नेदरल्यान्डस् र स्वीडेनबीच खेल हुनेछ ।