एजेन्सी – इंग्लिस क्लब लिभरपुलका फरवार्ड साडियो माने ह्याट्रिक गर्नबाट चुकेको खेलमा सेनेगलले केन्यालाई पराजित गर्दै प्रि–क्वाटरफाइनलमा स्थान बनाएको छ ।

साडियो मानेको दुई गोल सहयोगमा सेनेगलले केन्यालाई ३–० ले पराजित गर्दै समूह ‘सी’ बाट उपविजेताको रुपमा अन्तिम १६ मा स्थान बनाएको हो । एक गोल इस्माइला सारले थपे ।

३० जुन स्टेडियममा सोमबार राति भएको अ‍ेलमा सेनेगलले खेलको २९औं मिनेटमा अग्रता लिने अवसर खेर फालेको थियो । सालउ सिसलाई पेनाल्टी बक्समा मुसा मेहम्मदले लडाएपछि प्राप्त पेनाल्टीमा साडियो माने चुकेका थिए ।

खेलभर नै केन्यालाई दवावमा राखेको सेनेगलले गोलको लागि दोस्रो हाफ नै कुर्नुपरेको थियो । ६३औं मिनेटमा इस्माइला सारले गोल गर्दै सेनेगललाई सुरुवाती अग्रता दिलाए । ७१औं मिनेटमा साडियो मानेले सेनेगलको अग्रता दोब्बर बनाए ।

७६औं मिनेटमा केन्या १० खेलाडीमा समेटियो । फिलमोन ओटिनो दोहोरो पहेलो कार्ड खादै मैदानबाट बाहिरिएका थिए । सुरुवातमै पेनाल्टी चुकाएका मानले ७८औं मिनेटमा पेनाल्टीमा गोल गर्दै सेनेगलको ३–० को जित पक्का गरे ।

यही समूहको अर्काे खेलमा अल्जेरियाले तान्जिनियालाई ३–० ले पराजित गर्दै समूह ‘सी’ बाट समूह विजेताको रुपमा अन्तिम १६ मा स्थान बनाएको छ ।

समूहमा शतप्रतिशत जित निकालेको अल्जेरियाको सहज जितमा एडाम औनासले २ तथा इस्लाम स्लिमानीले १ गोल गरे । यो समूहबाट केन्या र तान्जिनिया बाहिरिए ।