एजेन्सी – फ्रान्सेली क्लब पीएसजीसँग नयाँ सम्झौता गर्न नकार्दै फ्रान्सको राष्ट्रिय टोलीका लागि समेत खेलिसकेका मिडफिल्डर आड्रीयन राबीओट इटालियन क्लब युभेन्टस जाने भएका छन् ।

युरोपका ठूला क्लब बार्सिलोना र म्यानचेस्टर युनाइटेडले उनलाई अनुबन्ध गर्ने प्रयास गरेपनि राबीओटले युभेन्टस जाने निर्णय लिएका हुन् । युभेन्टसमा उनले वर्षको ९ मिलियन युरो कमाउनेछन् । इटालियन लिगमा रोनाल्डोपछि सर्वाधिक तलब राबीओटले नै कमाउनेछन् । शीर्षस्थानमा रहेका रोनाल्डोले वार्षिक ३१ मिलियन युरो कमाउँछन् ।

गत सिजन पीएसजीले नयाँ सम्झौताको प्रस्ताव राखेपनि उनले क्लबमा नरहने निर्णय लिएपछि पीएसजीले उनलाई पहिलो रोजाईमा मौका दिएको थिएन । उनले सिजनको अन्त्यसँगै युभेन्ट्समा सम्झौताका लागि छलफल गरेका हुन् । केहि दिनमा नै उनी युभेन्टसका खेलाडीको रुपमा प्रस्तुत हुनेछन् । राबीओटले पीएसजीमा रहेर १ सय ५० भन्दा बढी खेल खेल्दै ५ लिग वन उपाधि,४ पटक कप डे फ्रान्स र ५ पटक कप डे लिग उपाधि हात पारेका थिए ।

युभेन्टसले विगतमा पनि फ्री ट्रान्सफरमा खेलाडी अनुबन्ध गर्दै आएको थियो । इटालियन लिगमा लगातार वर्चस्व जमाउँदै आएको युभेन्ट्सले यसै सिजन मात्र आर्सनलबाट आरोन राम्सीलाई फ्री ट्रान्सफरमा अनुबन्ध गरेको हो । उनले वार्षिक ६.९ मिलियन युरो कमाउनेछन् । त्यसअघि क्लबले सामी खेडिरा, एम्रे च्यानलगायत खेलाडीलाई पनि फ्री ट्रान्सफरमै अनुबन्ध गरेको थियो ।