एजेन्सी – घरेलु टोली इजिप्ट अफ्रिका कप अफ नेसन्समा समूह विजेता बन्दै नकआउट चरणमा पुग्न सफल भएको छ । इजिप्टले समूह ‘ए’ मा अपराजित रहेर अन्तिम १६ मा स्थान बनाउन सफल भएको हो ।

घरेलु टोली इजिप्टले आइतबार राति भएको समूह ‘ए’ को अन्तिम खेलमा युगान्डालाई २–० ले हरायो । एजिप्टको जितमा मोहम्मद सलाह र अहमेद इएल मोहमादीले गोल गरे ।

कायरो अन्तर्राष्ट्रिय स्टेडियममा भएको खेलमा दुवै गोल पहिलो हाफमा सम्भव भएको थियो । खेलको ३६औं मिनेटमा सलाहले गोल गर्दै घरेलु टोलीलाई अग्रता दिलाएका थिए । करिव ३५ यार्डमा प्राप्त फ्रिकिकमा सलाहले सुन्दर गोल गरेका थिए ।

पहिलो हाफको इन्ज्युरी समयमा आयमन असरफको पासमा अहमेदले गोल गरेपछि घरेलु टोली खेलमा २–० ले अघि बढेको थियो । दोस्रो हाफमा दुवै टोलीले गोलका केही अवसर पाएपनि सदुपयोग हुन सकेन ।

अपराजित रहेको इजिप्टले ३ खेलबाट ९ अंक जोड्यो । हारपछि पनि युगान्डा उपविजेता बन्दै अन्तिम १६ मा पुग्न सफल भएको छ । युगान्डाले ४ अंक जोड्दै प्रि–क्वाटरफाइनलमा पुग्न सफल भयो । डिपिआर कंगोले ३ तथा जिम्वावेले एक अंक मात्रै जोड्यो ।

यही समूहको अर्काे खेलमा कंगोले जिम्वावेलाई ४–० ले पराजित गरेपनि नकआउट चरणमा पुग्न पर्याप्त भएन । कंगोको जितमा सेडरिका बकाम्बुले दुई तथा जोनाथन बोलिङगी र ब्रिट आसोमबालोङ्गाले समान १ गोल गरे ।