एजेन्सी – कोपा अमेरिका २०१९ अन्तर्गत अर्जेन्टिनाले सेमिफाइनलमा स्थान पक्का गरेको छ । क्वाटरफाइनलमा भेनेजुएलालाई २-० ले हराउँदै अर्जेन्टिना अन्तिम ४ मा प्रवेश गरेको हो ।

क्वाटरफाइनलमा जितपछि बोल्दै अर्जेन्टिनाका कप्तान मेस्सीले मैदानको अवस्था लज्जास्पद रहेको अभिव्यक्ति दिए । ‘मैदानको अवस्था निकै खराब छ । हामीले चाहेअनुसार बल नियन्त्रण भइरहेको छैन । कतै बल गुड्न कठिन हुन्छ त कतै बल खरायोजस्तो बल उफ्रेको देखिन्छ । मैदानको कमजोर अवस्थामा पनि हामी खेल्न बाध्य रहेका छौँ,’ मेस्सीले भने ।

अर्जेन्टिनाले अब फाइनल प्रवेशका निम्ति ब्राजिलको सामना गर्दैछ । यसका लागि टोली तयार भएको अर्जेन्टिनाका कप्तानले जनाएका छन् । ‘ हामी सेमिफाइनल पुग्न एकदम खुसी छौं । ब्राजिलसँगको खेल निकै कठिन हुने पक्का छ । उनीहरुसँग निकै राम्रो खेलाडी छन् । घरेलु मैदान भएकाले पनि उनीहरुलाई फाइदा छ । हामी फाइनलमा पुग्न सक्दो प्रयास गर्नेछौं,’ मेस्सीले थपे ।

अर्जेन्टिनाले सन् २००७ पछि पहिलो पटक ब्राजिलसँग खेल्दैछ । ब्राजिलले क्वाटरफाइनलमा पाराग्वेलाई टाइब्रेकरमा पराजित गर्दै सेमिफाइनलमा स्थान बनाएको हो । अर्जेन्टिना लगातार तेस्रो संस्करण फाइनलमा पुग्ने प्रयासमा छ । यसअघि अर्जेन्टिना सन् २०१५ र २०१६ को फाइनलमा चिलीसँग पराजित भएको थियो ।