एजेन्सी– वायने रुनीले आफुलाई इंग्ल्यान्ड र एमएलएस क्लबबाट प्रशिक्षणका लागि प्रस्ताव आएको खुलासा गरेका छन् । यद्दपी उनी अहिले पनि डिसी युनाइटेडका लागि व्यवासायिक फुटबल खेलिरहेका छन् ।

प्रिमियर लिगबाट रुनी अमेरिका पुगेको मंगलबार एक वर्ष पुरा भएको छ । वासिङ्टनको क्लबबाट खेल्दै उनले ४० खेलमा २३ गोल गरेका थिए । इंग्ल्यान्डका पूर्व कप्तान रुनी अक्टुबरमा ३४ वर्ष पुरा हुनेछन् । खेल्दाकै अवस्थामा उनलाई प्रशिक्षणको प्रस्ताव आएको छ ।

प्रशिक्षणमा जाने इच्छा छ भन्ने प्रश्नमा रुनीको जवाफ थियो, ‘पक्कै पनि जाने हो । जब मेरो खेलाडी जीवन सकिनेछ त्यसपछि जाने अर्को भनेको प्रशिक्षण मै हो । हेरौै त्यसपछि अवसर कसरी आउनेछ । केहि प्रस्ताव पनि आएका छन् । तर अहिलेको अवस्थामा म खेल्दैछु । म खेल्दैमा रमाइरहेको छ । खेल जीवनपछि प्रस्तावका बारेमा सोचेको छु । ‘

उनले प्रशिक्षणमा जाने अवसर विकल्प आफ्ना लागि रहने रुनीले विश्वास राखेका छन् । ‘म जति बेला बुट थन्क्याउनेछु त्यसपछि क्लबको लक्ष्य अनुसारको निर्णय लिइनेछ, ‘उनले भने ,’त्यसपछि क्लब र मेरो संयुक्त लक्ष्य बन्नेछ । ‘

इंग्ल्यान्डका पूर्व सहकर्मी मध्ये केहिले प्रशिक्षणमा आफुलाई संलग्न गरेका कारण पनि रुनी उत्साहित छन् । फ्रांन्क लाम्पार्डले आफ्नो पुरा क्लब चेल्सी सम्हाल्ने अवसर पाउने सम्भावना बढेको छ । स्कट पार्करले फुलह्यामलाई आउने सिजनमा च्याम्पियनसिपमा टोलीको नेतृत्व गर्नेछन् । जोन टेरीले सहायक प्रशिक्षक रुपमा जिम्मेवारी निर्वाह गरेको अवस्थामा एस्टन भिल्ला प्रिमियर लिगमा बढुवा भएको छ । लिभरपुलका पूर्व कप्तान स्टेभन जेरार्डले रेन्जर्सलाई प्रशिक्षण दिइरहेका छन् ।

‘ लाम्पार्ड वा अरु पनि इग्लिस खेलाडी जसले खेल जीवन सकाएका छन् उनीहरुका लागि प्रशिक्षण राम्रो विकल्प हो,’ रुनीले भने,’ चेल्सी जस्तो टोलीलाई हेर्ने मौका मिल्दा लाम्पार्डका लागि राम्रो मौका हो । ‘