काठमाडौं (हाम्रो खेलकुद) – पछिल्लो २ वर्षयता रोकिएको राष्ट्रिय स्तरको अन्तर विद्यालय फुटबल प्रतियोगिता यसवर्ष सुचारु भएको छ । चौधरी ग्रुपको उत्पादन क्विक्सको मुख्य प्रायोजन तथा युवा तथा खेलकुद मन्त्रालयको सहयोगमा अखिल नेपाल फुटबल संघ (एन्फा) ले देशभरका ५२ जिल्लामा प्रतियोगिता सुरु गरेको हो ।

सातदोबाटोस्थित एन्फा कम्प्लेक्समा शुक्रबार औपचारिक उद्घाटनसँगै प्रतियोगिता सुरु भएको छ । एन्फा अध्यक्ष कर्माछिरिङ शेर्पाका अनुसार यसपटक झन्डै १५ सय विद्यालयले प्रतियोगितामा ऐतिहासिक सहभागिता जनाउँदै छन् । देशभरका ५२ जिल्लामा सुरु भइसकेको यस प्रतियोगिता अझै थप केहि जिल्लामा पनि सुरु गर्न गृहकार्य भइरहेको छ ।

प्रतियोगितामा जिल्ला स्तर, प्रदेश स्तर र राष्ट्रिय स्तर गर्दै तीन चरणमा प्रतियोगिता हुनेछ । युवा तथा खेलकुद मन्त्रालयका सचिव कृष्णप्रसाद देवकोटाले एन्फाले ग्रासरुट देखिनै फुटबल विकास गर्ने लक्ष्यसाथ चलेको यस कदमलाई सरकारले उच्च मुल्यांकन गरेको बताए । मुख्य प्रायोजक चौधरी ग्रुपका सहायक महाप्रबन्धक लालबाबु प्रसादले नेपाली खेलकुदको विकासमा चौधरी ग्रुपले सधैं साथ दिएको भन्दै आउने दिनमा नेपाली फुटबलमा यो प्रतियोगिता कोशेढुंगा सावित हुने विश्वास व्यक्त गरे ।

प्रतियोगिताको उद्घाटन सत्रमा २९ विद्यालयले मार्चपासमा सहभागिता जनाएका थिए । उद्घाटन खेलमा भने लिटल एन्जल्स (एलए) स्कुलले मुनाल थापाको ह्याट्रिकमा श्री कृष्ण माध्यमिक विद्यालयलाई ४-१ ले पराजित गर्यो । पहिलो हाफको इन्ज्युरी समयमा मुनालले एलएलाई अग्रता दिलाए । मुनालले नै ४५ औं मिनेटमा एलएको अग्रता दोब्बर पारे । ४८ औं मिनेटमा विषम पुनले गोल गर्दै एलएलाई ३-० ले अगाडी बढाए । श्री कृष्णका कप्तान निरन लामाले ५३ औं मिनेटमा गोलअन्तर कम गरे । तर मुनालले इन्ज्युरी समयको चौथो मिनेटमा गोल गर्दै जित पक्का गरे ।