एजेन्सी – कोपा अमेरिका २०१९ अन्तर्गत क्वाटरफाइनलमा उपाधि दाबेदार अर्जेन्टिनाले भेनेजुएलाको सामना गर्दैछ । समूह चरणमा खराब प्रदर्शन गरेको अर्जेन्टिना नकआउट चरणमा त्यसलाई सुधार्दै अन्तिम ४ मा पुग्ने लक्ष्यमा हुनेछ ।

यसैबीच ब्राजिलका दिग्गज फरवार्ड रिभाल्डोले मेस्सी सम्मिलित अर्जेन्टिनालाई कमजोर आँक्न नमिल्ने बताएका छन् । बार्सिलोनाको कप्तान समेत रहेर गत सिजन ५१ गोल गरेका मेस्सीले युरोपेली गोल्डेन बुट, पिचिचि अवार्ड र च्याम्पियन्स लिगको सर्वाधिक गोलकर्ता समेत बने । उनको उत्कृष्ट प्रदर्शनमा बार्सिलोनाले ला लिगा उपाधि पनि रक्षा गरेको थियो ।

क्लबका लागि प्रभावशाली प्रदर्शन गरेका मेस्सीले अर्जेन्टिनाका लागि भने कोपा अमेरिकामा सोहि अनुसार प्रभाव जमाउन सकेनन् । विश्वकपपछि राष्ट्रिय टोलीबाट लामो विश्राम लिएका मेस्सीले कोपा अमेरिकामा अपेक्षित प्रदर्शन गर्न सकेका छैनन् । समूह चरणका तीन खेलमा १ जित, १ बराबर र १ हार बेहोरेको अर्जेन्टिनाले क्वार्टरफाइनल चरण पार गरे ब्राजिलसँग सेमिफाइनल खेल्नेछ ।

ब्राजिलका लागि आक्रमण सम्हाल्दै पृथक पहिचान बनाएका फरवार्ड रिभाल्डोले मेस्सीसहितको अर्जेन्टिनाले जे पनि गर्न सक्षम रहेको अभिव्यक्ति दिए । ‘ मेस्सी भएको टोली सहज हुने छैन । ब्राजिललाई फाइनल यात्रा त्यति सहज हुने देख्दिन । ठूला खेलमा मेस्सीले निर्णायक प्रदर्शन गर्ने क्षमता राख्छन्’, उनले थपे ‘ अर्जेन्टिनालाई अहिले मेस्सीको निकै आवश्यकता छ । र मेस्सीले यस्तो अवस्थामा प्रदर्शन गर्न जानेका छन् ।’

रिभाल्डोले मेस्सीअर्जेन्टिनाबाट खेल्दा अभागी रहेको पनि बताए । ‘मेस्सी अर्जेन्टिनाका लागि ठूला खेल खेल्दा अभागी रहँदै एक छन् । सन् २०१४ को विश्वकप फाइनल होस् या चिलीविरुद्ध दुई पटक कोपा अमेरिका फाइनल, ब्राजिलले सन् २००२ को विश्वकप फाइनलमा पाएजस्तो भाग्य मेस्सीले पाएनन्,’ उनले भने । रिभाल्डोका अनुसार क्लबभन्दा राष्ट्रिय टोलीमा खेलाडी नियमित खेल्न नपाइने र सहकर्मी खेलाडी परिवर्तन हुनाले पनि कठिन हुने गर्दछ ।