काठमाडौं (हाम्रो खेलकुद) – विराटनगर महानगरपलिका मोरङले राजधानीमा जारी प्रथम उपमेयर कप महिला फुटबल प्रतियोगिताको उपाधि जितेको छ ।

हल्चोकस्थित एपीएफको फुटबल मैदानमा बिहीबार भएको फाइनलमा बाह्रबिसे नगरपालिका सिन्धुपाल्चोकलाई टाइब्रेकरमा ४-१ ले पराजित गर्दै विराटनगर उपाधि जित्न सफल भएको हो । निर्धारित समयको खेल १-१ को बराबरीमा सकिएपछि खेलको नतिजा टाइब्रेकरमा लिइएको थियो । बाह्रबिसेका लागि सम्झना लावतीले गोल गरिन् । विराटनगरकी जमुना मगरले गोल गरिन् ।

प्रतिस्पर्धात्मक खेलको २८औं मिनेटमा सम्झना लावतीले गोल गर्दै बाह्रबिसेलाई अग्रता दिलाएकी थिइन् । उनले पेनाल्टी बक्सबाहिरबाट गरेको सशक्त प्रहार सिधै गोलमा परिणत हुदा विराटनगरकी कल्पना कार्कीले रोक्ने कुनै खवसर नै पाइनन् । लगत्तै २९औं मिनेटमा जमुना मगरको क्रसमा सावित्रा मगरले बराबरी गोल फर्काउनबाट चुकिन् । ३८औं मिनेटमा रेखा पौडेलले बक्सभित्रबाट प्रहार गर्न ढिला गर्दा डिफेन्सले क्लियर गरिदिए ।

पहिलो हाफमा १–० ले पछि परेको विराटनगरले दोस्रो हाफको शुरुमै बराबरी गोल फर्काउन सफल भयो । ४६औं मिनेटमा विराटनगरकी जमुना मगरले बराबरी गोल फर्काइन् । ३९औं मिनेटमा विराटनगरले अग्रता लिने सुन्दर मौका खेर फाल्यो । इमा राईको प्रहार बारमा लागेर फर्किएको थियो । त्यसपछि दुवै टोलीले गोल गर्न नसक्दा खेल पेनाल्टीसुटआउटमा धकेलिएको थियो ।

टाइब्रेकरमा बाह्रबिसेका सुष्मा तामाङ र अनु राईले लगातार दोस्रो र तेस्रो प्रहार चुकाउँदा विराटनगर विजयी रहयो । विराटनगर रेखा पौडेल, इमा राई, विधा राना र कप्तान मनमाया लिम्बुले गोल गरे ।

विराटनगरले उपाधिसहित ५ लाख रुपैया हात पार्यो । दोस्रो भएको बाह्रबिसेले ३ लाख रुपैयाँमा चित्त बुझायो ।

जेठ ३१ गतेबाट शुरु भएको प्रतियोगितामा देशभरका १८ महानगर तथा नगरपालिकाले लिग कम नकआउटको आधारमा प्रतिस्पर्धा गरेका थिए । सहभागी टोलीलाई ४ समूहमा विभाजन गरिएको थियो । हरेक समूहका शीर्ष टोलीले सेमिफाइनलमा स्थान बनाएका थिए ।