एजेन्सी – आयोजक इजिप्ट अफ्रिका कप अप नेसन्सको प्रि–क्वाटरफाइनलमा प्रवेश गरेको छ । इजिप्टले डीपिआर कंगोलाई २–० ले पराजित गर्दै समूहमा एक खेल बाँकी छदै अन्तिम १६ को यात्रा तय गर्न सफल भएको हो ।

दुई खेलबाट इजिप्टको समूह ‘ए’ मा ६ अंक रहेको छ । युगान्डाको ४ तथा जिम्वावेको १ अंक तथा कंगो अंकविहीन छ । अब इजिप्टले युगान्डासँग खेल्न बाँकी छ । यो खेलमा सफलता हात पारे इजिप्ट समूह विजेताको रुपमा अघि बढ्ने छ ।

कायरो इन्टरनेसनल स्टेडियममा घरेलु टोलीलाई जिताउन अहमेद इएल मेहमाडी र मोहम्मद सलाहले गोल गरे । दुवै गोल पहिलो हाफमा सम्भव भएको थियो ।

खेलको २५औं मिनेटमा अहमेद इउलको गोलमा घरेलु टोलीले अग्रता बनाएको थियो । ४३औं मिनेटमा सलाहले गोल गरेसँगै इजिप्ट पहिलो हाफमा २–० ले अघि बढेको थियो ।

दोस्रो हाफमा घरेलु टोलीलाई दवावमा राखेपनि आयोजकले पहिलो हाफमा लिएको अग्रता जोगाइराख्न सफल भयो । खेलको इन्ज्युरी समयटिर कंगोले इजिप्टका पोस्टमा लगातार पाँच आक्रमण बुनेपनि गोल गर्न नसक्दा पराजित हुन पुग्यो ।

यही समूहको अर्काे खेलमा युगान्डा र जिम्वालेले १–१ गोलको बराबरी खेल्दै अंक बाँडे । समूह ‘बी’ को खेलमा नाइजेरियाले गिनियालाई १–० ले हरायो । नाइजेरियाको जितमा केनेथ ओमेरोउले एक गाल गरे ।

जितसँगै नाइजेरियाले पनि प्रि–क्वाटरफाइनलमा स्थान बनाएको छ । नाइजेरियाको २ खेलबाट ६ अंक पुगेको छ । माडागास्कार र गिनियाको समान १ अंकसहित दोस्रो र तेस्रो स्थानमा रहँदा बुरुन्डी अकंविहीन हुदै पुछारमा छ ।