काठमाडौं (हाम्रो खेलकुद) – ए डिभिजन लिग च्याम्पियन सिग्नेचर मनाङ–मर्स्याङ्दी क्लबलाई एएफसी कप फुटबल अन्तर्गत समूह चरणको अन्तिम खेलमा कुनै दबाब हुने छैन । टोलीले बुधबार भारतीय क्लब चेन्नाइयन एफसीसँग हुने खेल जितेपनि टोली एएफसी कपको अघिल्लो चरणमा पुग्ने छैन ।

सुखद अन्त्य मात्र मनाङको एकमात्र लक्ष्य रहेको छ । खेल सातदोबाटोस्थित एन्फा कम्प्लेक्समा दिउँसो ४ः१५ बजे शुरु हुनेछ । चेन्नाईयिनसँगको खेलअघि मनाङका मुख्य प्रशिक्षक छिरिङ लोप्साङ गुरुङले अन्तिम खेल जित्ने लक्ष्यसहित मैदान उत्रने बताएका छन् ।

‘हामी घरेलु मैदानमा एएफसी कपको अन्तिम खेल खेल्दैछौँ । पाँचौ चरणको खेलमा ढाकाको अवहानीसँग फराकिलो हार बेहोरेपनि हाम्रो मनोबल घटेको छैन । हारबाट पाठ सिकेका छौं,’ प्रशिक्षक लोप्साङल प्रि–म्याच पत्रकार सम्मेलनमा भने, ‘हाम्रो तीनै प्रतिद्वन्द्वी निकै व्यवसायिक थिए । हामीले एएफसी कपको यात्रामा उनीहरुबाट धेरै सिकेका छौं । हाम्रो मुख्य उद्देश्य राम्रो छाप छाड्दै प्रतियोगिताको अन्त्य गर्ने हो ।’ लोप्साङले अवे मैदानमा बेहोरेको २–० को हारको बदला लिने समेत थपेका छन् । उनले सान्त्वना जित निकाल्दै प्रतियोगितामा राम्रो छाप छाड्ने लक्ष्यसहित मैदान पुनः दोहोर्याए ।

अघिल्लो चरण पुग्ने सम्भावना जीवित राख्न चेन्नाइयिनका लागि भने मनाङमाथि जित निकाल्नु पर्ने हुन्छ । चेन्नाइयिनका प्रशिक्षक जोन चार्लेसले मनाङविरुद्ध उसकै मैदानमा उत्रँदा कुनै दबाब महसुस नगरेको बताएका छन् । उनले जितकै एक मात्र लक्ष्य र त्यसमा टोली ढुक्क रहेको बताएका छन् । समूह ‘ई’ को पुछारमा रहेको मनाङले ५ खेलमा २ अंक जोडेको छ । चेन्नाइयिन ८ अंक जोडेर दोस्रो स्थानमा स्थानमा छ । समूहबाट शीर्ष स्थानको टोली दोस्रो चरणमा प्रवेश गर्नेछ ।