बार्सिलोना (एजेन्सी)– नेयमारसँग एउटै क्लबमा खेल्ने अवसर मिल्दा आफुलाई खुसी लाग्ने बार्सिलोनाका मिडफिल्डर फिलिपे काउटिन्होले बताएका छन् । उनले ब्राजिलियन सहकर्मी नेयमारलाई सुपरस्टार रहेको समेत बताएका छन् ।

नेयमारले पेरिस सेन्ट जर्मेन (पिएसजी) मा दुई सिजन मात्र बिताएका छन् । टोलीलाई धेरै उपाधि जिताउने लक्ष्यका साथ नेयमार बार्सिलोनाबाट पिएसजी पुगेका थिए । तर, छोटो समयमै ब्राजिलियन लिग वान च्याम्पियन्स टोली छोड्न चाहेको खबर चर्चामा छन् । बार्सिलोना पनि पूर्व स्टारलाई भित्राउने प्रयासमा रहेको बताइएको छ । बार्सिलोना र नेयमारबीच ५ वर्षको लागि मौखिक सम्झौता समेत भइसकेको खुल्न आएको छ ।

नेयमारको पुनरागमनको चर्चासँगै काउटिन्होको क्लब छाड्ने प्रसंग सुरु भएको छ । यद्दपी उनले नेयमारसँग खेल्ने अवसर मिलेमा आफुका लागि खुसी लाग्ने बताएका छन् । ‘नेयमारसँग खेल्न पाउनु साच्चै मेरो लागि खुसीको कुरा हो । उनी सुपर स्टार हुन्, ‘काउन्टिहोले भने,’ मलाई थाहा छैन के हुन्छ । तर उनीसँग खेल्ने कुरा गर्दा पनि खुसी लाग्छ । उनी अर्कै क्षमता भएका खेलाडी हुन् । उनी जुन सुकै टोलीका लागि पनि महत्वपूर्ण खेलाडी हुन् । ‘

नेयमारको प्रतिभा र क्षमतालाई कसैले पनि नकार्न नसक्ने काउन्टिहोले बताएका छन् ।
‘अहिलेको अवस्थामा मानिसका धेरै खाले कुरा हुन्छन् । तर, के हुन्छ भन्न सकिन्न,’ उनले भने , ‘उनी एउटा समूहको अंग हुन् । उनी समूह सँगै छन्, तर हामीले यी सबै विषयमा केहि कुरा गरेका छैनौं ।’

बार्सिलोनाका अर्का खेलाडी अर्थरले पनि नेयमार क्लबमा फर्केर आए खुसी लाग्ने बताएका छन् । उनले जति राम्रो खेलाडी क्लबमा भित्राए क्लब त्यत्ति नै बलियो हुने बताए । नेयमारका विषयमा उनले भने,’ निश्चयनै मलाई उनी राम्रो लाग्छ । उनी उत्कृष्ट खेलाडी हुन् । मेरो लागि मात्र होइन उनी सबैका लागि उत्कृष्ट खेलाडी हुन् । ‘