एजेन्सी– इंग्लिस क्लब म्यानचेस्टर सिटीका फरावर्ड रियाद महारेजको गोल सहयोगमा अल्जेरियाले अफ्रिका कप अफ नेसन्समा विजयी शुरुवात गरेको छ ।

इजिप्टमा जारी नेसन्स कपमा समूह ‘सी’ मा रहेको अल्जेरियाले केन्यालाई २–० ले पराजित गरेको हो । अल्जेरियाको सहज जितमा बग्दाद बाउनेजा र रियाद महारेजले गोल गरे । दुवै गोल पहिलो हाफमा सम्भव भएको थियो ।

खेलको ३४औं मिनेटमा बग्दादले पेनाल्टीमा गोल गर्दै अल्जेरियालाई अग्रता दिलाएका थिए । ४३औं मिनेटमा महारेजले गोल गर्दै अल्जेरियालाई पहिलो हाफमा २–० को अग्रता दिलाए । दोस्रो हाफमा थप गोल निस्कन नसक्दा अल्जेरिया २–० ले विजयी हुन सफल भयो ।

यही समूहको अर्काे खेलमा सेनेगलले तान्जिनियालाई २–० ले नै पराजित गरेको छ । सेनगलको जितमा केइटा बाल्डे र क्रिपिन डिट्टाले गोल गरे । जितसँगै अल्जेरिया र सेनेगलले समूह ‘सी’ मा ३ अंक जोडेको छ । पराजित केन्या र तान्जिनिया अंकविहीन छ ।

समूह ‘डी’ को खेलमा मोराक्कोले नामिवियालाई १–० ले पराजित गरेको छ । मोरोक्कोको जितमा अन्तिम समयमा भएको आत्मघाती गोल नै निर्णायक बन्यो । बराबरीतर्फ धकेलिएको खेलको ८९औं मिनेटमा विपक्षीको प्रहार बचाउने क्रममा इटामुन्वा केइमुन्नेले आत्मघाती गोल गर्न पुगेका थिए ।

जितसँगै मोरोक्कोले समूह ‘डी’ मा ३ अंक जोडेको छ । पारजित नामिविया पुछारमा छ ।