काठमाडौं (हाम्रो खेलकुद) – सिएमजी क्लब संकटाले ललित मेमोरियल यु–१८ फुटबल प्रतियोगितामा मच्छिन्द्रसँग लज्जास्पद हार बेहोरेको छ । सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा संकटा मच्छिन्द्रसँग ४–० को लज्जास्पद हार बेहोरेको हो ।

मच्छिन्द्रलाई फराकिलो जित दिलाउन कार्लाेस बारखरियाले ह्याट्रिक पुरा गरे । रोशन भुजेलले एक गोल थपे ।

खेलको छैटौ मिनेटमा कार्लाेस बारखरियाको गोलबाट मच्छिन्द्रले खेलमा अग्रता बनाएको थियो । ४२औं मिनेटमा कार्लाेसले व्यक्तिगत दोस्रो गोल थपेपछि मच्छिन्द्र पहिलो हाफमा २–० को अग्रता बनायो ।

४८औं मिनेटमा रोशन भुजेलले गोल गरेपछि मच्छिन्द्र ३–० ले अघि बढेको थियो । ८२औं मिनेटमा कार्लाेसले ह्याट्रिक पुरा गर्दै मच्छिन्द्रलाई ४–० को फराकिलो जित दिलाए । एन्फाले ‘सी’ डिभिजन छनोटका कारण प्रतियोगिता एक साता स्थगित गरेको थियो ।

यसउअघि उद्घाटन खेलमा एनआरटीले विजयी शुरुवात गरेको थियो । आज दोस्रो खेलमा मनाङ र थ्री स्टारबीच खेल्दैछ ।

प्रतियोगितामा ‘ए’ डिभिजनका १४ टोलीको सहभागिता रहेको छ । प्रतियोगिताको समूह ‘ए’ मा हिमालयन शेर्पा क्लब, न्युरोड टिम (एनआरटी), सिएमजी क्लब संकटा, मछिन्द्र क्लब र भ्याली च्यासल युथ क्लब रहेका छन् ।

ग्रुप अफ डेथ मानिएको समूह ‘बी’ मा उपाधिका दावेदार टोली त्रिभुवन आर्मी क्लब, रुस्लान थ्री स्टार क्लब, सिग्नेचर मनाङ–मस्र्याङ्दी क्लब, नेपाल एपीएफ महिन्द्रा फुटबल क्लब र फ्रेन्डस् क्लब रहेका छन् । समूह ‘सी’ मा नेपाल पुलिस क्लब, ब्रिगेड ब्वाइज क्लब, सरस्वती युवा क्लब र जावलाखेल युथ क्लब रहेका छन् ।

प्रतियोगिता ३१ असारसम्म सञ्चालन हुनेछ । लिग कम नकआउटका आधारमा सञ्चालन हुने प्रतियोगिताको तीन समूह विजेता र उपविजेता तथा दुई उत्कृष्ट तेस्रो टोलीले क्वाटरफाइनलमा स्थान बनाउनेछ ।

प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ । प्रतियोगिताको लागि सबै टोलीलाई तयारी खर्च स्वरुप १ लाख २५ हजार प्रदान गरने एन्फाले जनाएको छ ।

प्रतियोगिताको सुरुवाती दुई संस्करण आर्मी च्याम्पियन बन्दा गत संस्करणमा ब्रिगेड ब्वाईज च्याम्पियन बनेको थिय ।