एजेन्सी – विश्व विजेता स्पेनका भेट्रान्स फरवार्ड फर्नान्डो टोरेसेले सबै खाले व्यवसायिक फुटबलबाट सन्न्यासको घोषणा गरेका छन् ।

३५ वर्षीय टोरेसले शुक्रबार सामाजकि सन्जाल ट्वीटरबाट सबै खाले व्यवसायिक फुटबलबाट सन्न्यास लिएको घोषणा गरेका हुन् । उनले १८ वर्षे व्यवसायिक खेल करियरबाट सन्न्यासको घोषणा गरेका हुन् ।

स्पेनका भेट्रान्स टोरेसले १८ वर्षे खेल करियरमा क्लब फुटबलमा एट्लेटिको म्याड्रिड, लिभरपुल, चेल्सी र जापानिज क्लब सागन टोसुबाट पछिल्लोपटक खेलेका थिए ।

‘मैले आज एक विशेष कुरालाई घोषणा गर्न गइरहेको छु । मैले १८ वर्षै खेल करियरबाट सन्न्यास लिने घोषणा गरेको छु । यसबारे मैले आउदो आइतबार टोकियोमा पत्रकार सम्मेलनको आयोजना गर्दै आधिकारिक धारणा बाहिर ल्याउनेछु ।’ टोरेसले सामाजिक सन्जाल ट्वीटरमा लेखेका छन् ।

स्पेनले २००८ देखि २०१२ सम्म चारवर्षको अन्तरालमा दुई युरोकप र एक विश्वकप जित्दा टोरेस महत्वपुर्ण खेलाडी रहेका थिए । दुई पटकको युरो च्याम्पियन टोरेसकै उच्च प्रदर्शनमा चेल्सीले च्याम्पियन्स लिगको सेमिफाइनलको अवे खेलमा गरेको गोलको निकै चर्चा हुने गरेको छ ।

सन् २००८ को युरोकप फाइनलमा जर्मनीविरुद्ध १–० को जित निकालेको खेलमा टोरेसले नै निर्णायक गोल गरेका थिए । युरो २०१२ को फाइनलमा स्पेनले इटालीमाथि ४–० को जित निकालेको खेलमा पनि टोरेसले एक गोल गरेका थिए ।

एट्लेटिको म्याड्रिडका युथ टिमका कप्तानसमेत रहेका टोरेस सन् २००७ मा क्लबको कीर्तिमानी मुल्य २० मिलियन पाउण्डमा लिभरपुलमा आबद्ध भएका थिए । लिभरपुलबाट उनी सन् २०११ बेलायतको कीर्तिमानी मुल्यमा चेल्सी पुगेका थिए ।

टोरेसले आफ्नो सिनियर खेल करियरमा राष्ट्र र क्लबका लागि २९८ गोल गरेका छन् । उनी एक समय आफ्नो खेल करियरमा कुल फिनिसरको उपमा पाएका थिए । चोटले थिचेपछि उनको खेल खस्कदै गएको थियो ।

त्यसपछि उनी लोनमा एसी मिलान पुगेका थिए । एसी मिलानपछि लोनमै सन् २०१६ मा आफ्नो बाल्यकाल क्लब एट्लेटिको पुगेका टोरेस सन् २०१८ सम्म एट्लेटिकोमा रहेका थिए । गतवर्ष उनी जापानिज क्लब सगन टोसुमा पुगेका थिए । त्यहाँ रहँदा टोरेस २८ खेलमा ३ गोल गरेका थिए ।
उनले स्पेनबाट २००३ देखि २०१४ सम्म ११० खेलमा ३८ अन्तर्राष्ट्रिय गाल गरेका थिए ।

त्यसपछि उनले अन्तर्राष्ट्रिय फुटबलबाट सन्न्यासको घोषणा गरेका थिए । उनले आफ्नो खेल करियरमा एक विश्वकप, दुई युरोकप, एक च्याम्पियन्स लिग, दुई युरोपा लिग र एक एफए कप जितेका छन् ।