एजेन्सी – फ्रेन्च लिग वान च्याम्पियन पेरिस सेन्ट जर्मेन (पीएसजी)ले आफ्ना स्टार खेलाडी नेयमार अनुबन्ध गर्ने तयारीका रहेको स्पेनिस क्लब रियल म्याड्रिड समक्ष नयाँ प्रस्ताव राखेको छ ।

पीएसजीले रियल समक्ष विश्व कीर्तिमानी नेयमारको मुल्य १९६ मिलियन पाउन्ड राख्दै डिफेन्सिभ मिडफिल्डर ब्राजिली क्यासमिरो माग गरेको हो । नेयमार २२२ मिलियन पाउन्डमा सन् २०१७ मा स्पेनिस क्लब बार्सिलोनाबाट पीएसजी पुगेका थिए ।

रियल नेयमार अनुबन्ध गर्न इच्छुक रहेपनि बढी मुल्यका कारण पछि हटिरहेको छ । पीएसजीको यो माग सबै कुरा क्यासमिरोमा अडिएको छ । क्यासमिरोले पीएसजी जाने चासो देखाएको खण्डमा दुवै क्लब यस विषयमा सहमत हुन सक्ने देखिएको छ ।

पीएसजीले ३६ वर्षीय आफ्ना भेट्रान्स खेलाडी थियागो मोट्टाको विकल्पको खोजीमा छ । यसक्रममा पीएसजीले ब्राजिल तथा रियलका क्यासमिरोलाई अघि सारेको हो ।

रियल क्यासमिरो बेच्ने पक्षमा छैन । तर, यसै सिजन जिनेदिन जिदान पुनः रियलको प्रशिक्षकमा नियुक्त भएपछि क्यासमिरोले कमै मात्रामा मौका पाएका छन् । रियलले फ्रान्स तथा इंग्लिस क्लब म्यानचेस्टर युनाइटेडका पल पोग्वालाई अनुबन्ध गर्ने प्रयास गरिरहेको छ । रियल र जिदान यसमा सफल भए क्यासमिरोको बाहिरिने सम्भावना हुनेछ ।

यो सिजन खेलाडी अनुबन्धमा ३०० मिलियन पाउन्ड खर्च गरिसकेको रियले अब बाँकी खेलाडी अुनबन्ध गर्नको लागि १५० मिलियन पाउन्डमा आफ्ना खेलाडी बेच्नुपर्ने हुन्छ ।