एजेन्सी – अर्जेन्टिनी राष्ट्रिय फुटबल टोलीका पूर्वकप्तान तथा पूर्व प्रशिक्षक डिएगो म्याराडोनाले कोपा अमेरिकाको पहिलो खेलमा कोलोम्बियासँग पराजित भएपछि लिओनेल मेस्सीको कप्तानीमा रहेको अर्जेन्टिनी टोलीको आलोचना गरेका छन् ।

अर्जेन्टिनाले समूह ‘बी’ को पहिलो खेलमा कोलोम्बियासँग २-० को हार बेहोर्दै प्रतियोगितामा खराब सुरुवात गरेको हो । पहिलो हाफमा सुस्त प्रदर्शन गरेको अर्जेन्टिनाले दोस्रो हाफमा सुधारिएको प्रदर्शन गरेपनि जित दर्ता गर्न भने सकेन । कोलोम्बियाले अग्रता लिनुभन्दा केहि समय अगाडी मेस्सीले गोलरक्षक पोजिसनमा नभएको अवस्थामा हेडरलाई पोस्टको दिशा दिन नसक्दा अर्जेन्टिना अग्रता लिनबाट चुकेको थियो ।

अर्जेन्टिनालाई सन् १९८६ को विश्वकप दिलाउन महत्त्वपूर्ण योगदान दिएका म्याराडोनाले पहिलो खेलबारे अर्जेन्टिनी टेलिभिजन टिवाईसी स्पोर्ट्ससँग बोल्दै टोलीको प्रदर्शन निकै खराब रहेको बताए । ‘ अर्जेन्टिनाले निकै खराब प्रदर्शन गर्यो । यस्तो अवस्थामा टोङ्गाले पनि अर्जेन्टिनालाई पराजित गर्न सक्छ,’ उनले थपे, ‘ हामीले राष्ट्रिय टोलीका लागि खेल्दा बेग्लै गौरव अनुभूति गर्थ्यौं । अहिले त्यो सब कहाँ छ? राष्ट्रिय टोलीको जर्सी भनेको आमा समान हुन् ।’ टोङ्गा फिफा वरीयतामा २ सय २ स्थानमा रहेको टोली हो ।

अर्जेन्टिनाले समूह ‘बी’ को खेलमा पाराग्वेको सामना गर्दैछ । यस समूहमा कतार र कोलोम्बिया पनि रहेका छन् । यसअघि कतार र पाराग्वेको खेल २-२ को बराबरीमा सकिएको थियो ।