गाईघाट (हाम्रो खेलकुद)– नेपाल पुलिस क्लबलाई टाइब्रेकरमा स्तब्ध पार्दै मोरङ फुटबल फुटबल एकेडेमी छैटौं रमपम उदयपुर गोल्डकपको सेमिफाइनलमा पुगेको छ । थारुहट उदयपुर रंगशालामा सोमबार निर्धारित समय २–२ को बराबरीमा टुंगिएपछि टाइब्रेकरमा मोरङले बाजीमा पारेको थियो ।

टाइब्रेकरमा मोरङका लागि विवके पौडेल, दीपक राई, विक्रम लिम्बु र उमेश कार्कीले गोल गर्न सके ।  पुलिगका लागि सुमन लामा र दिनेश गुरुङले गोल गरे । अजित भण्डारीको प्रहारलाई भने मोरङका गोलकिपर सूर्य अधिकारीले रोके भने भरत शाहको प्रहार बाहिरिएको थियो । गोलकिपर सूर्य म्यान अफ दी म्याच घोषित भए र उनले ७ हजार रुपैयाँ प्राप्त गरे । 

त्यसअघि दुवै टोली एक एक पटक अग्रता लिए पनि जोगाउन सकेनन् । मोरङका लागि दुवै गोल नवयुग श्रेष्ठले गरे । ११ औैं मिनेटमा नवयुगको गोलबाट मोरङ अघि लागेको थियो । पुलिसका रवि पासवानले १९ औं मिनेटमा बराबरी गोल गरे । मोरङका विकास खवासको अत्मघाती गोलमा पुलिसले खेलमा अग्रता लिएको थियो । ७१ औं मिनेटमा नवयुगको गोलमा मोरङले खेलमा बराबरी गोल फर्काएका थिए । 

उदयपुर जिल्ला फुटबल संघको आयोजनामा जारी प्रतियोगितामा मंगलबार सिएमजी क्लब संकटा र गोर्खा ब्वाइज रुपन्देहीबीच प्रतिस्पर्धा हुनेछ ।