एजेन्सी – कोपा अमेरिका अन्तर्गत समूह चरणको पहिलो खेलमा अर्जेन्टिना कोलोम्बियासँग २-० ले पराजित भयो । निकै प्रतिस्पर्धात्मक खेलको दोस्रो हाफमा कोलोम्बियाले २ गोल गर्दै अर्जेन्टिनालाई स्तब्ध बनाएको थियो ।

सन् २००७ यता कोलोम्बियाले पहिलो पटक अर्जेन्टिनालाई पराजित गरेको हो । हारका बाबजुद अर्जेन्टिनाका कप्तान लिओनेल मेस्सीले खेलमा सकारात्मक पक्ष पनि रहेको अटाएका छन् । ‘ यस खेलमा सकारात्मक पक्ष पनि रहे । अब हामीसँग अगाडी रहेको चुनौती स्वीकार्नुको विकल्प छैन । गुनासो गरेर केहि हुनेवाला छैन, अब हामीले अगाडी बढ्नुपर्छ । प्रतियोगितामा अझै धेरै खेल बाँकी छन्,’ मेस्सीले भने ।

‘कोलम्बियाले बल पोसेसनमा राम्रो पकड राख्यो । हामीले अपेक्षा गरेअनुसार आक्रमण बुन्न पनि सकेनौं । जब हामीले दोस्रो हाफमा केहि आक्रामक प्रस्तुत हुने तयारी गर्यौं विपक्षी टोलीले गोल गर्यो । हामीले राम्रो पकड बनाएको अवस्थामा उनीहरुले गोल गर्दा खेलको नतिजा बदलिएको हो,’ उनले थपे ।

‘हामीले यस हारलाई आउने खेलका लागि पाठका रुपमा लिएका छौं । अझैपनि प्रतियोगितामा भविष्य हाम्रै हातमा रहेको छ । हारबाट प्रतियोगिता सुरुवात गर्नु सहज हुँदैन तर यदि हामीले अर्को खेलमा जित दर्ता गर्यौं भने हामी सहज अवस्थामा पुग्नेछौं,’ मेस्सीले टुंग्याए ।

अर्जेन्टिनाले समूहको दोस्रो खेलमा पाराग्वेको सामना गर्दैछ । नेपाली समयानुसार खेल अर्को बिहीबार विहान ६:१५ बजे हुनेछ । अर्जेन्टिना रहेको समूह ‘बी’ मा कोलम्बिया, कतार र पाराग्वे रहेका छन् ।

यो पनि : नेपाली समयानुसार कोपा अमेरिकाको पूर्ण खेलतालिका